O delegado do Goberno en Galicia, Pedro Blanco, visitou onte o concello de Coles, onde mantivo un encontro co alcalde da localidade, Manuel Rodríguez, con quen supervisou as obras de mellora do sistema de saneamento, que permiten poñer fin ás verteduras no municipio
Estes traballos consistiron na construción dunha rede de colectores no núcleo de Sequeiros que recollen as augas residuais e as conducen ata un novo pozo de bombeo na estrada de Seoane para despois conectar coa rede de saneamento de Ourense, que tivo que ampliar a capacidade das súas conducións para posibilitar a conexión destes novos vertidos coa EDAR.
Pedro Blanco sinalou a necesidade de apoiar aos municipios, especialmente aos máis pequenos, na mellora dos seus servizos e infraestruturas para frear a perda de poboación no rural e para garantir aos seus habitantes un futuro coas mesmas oportunidades para todos e todas. Repasou co alcalde outros proxectos, como os traballos para a rehabilitación e mellora da eficiencia enerxética a través de renovables en inmobles públicos.
