No mes de xuño estará operativo o demandado parque que abarcará as comarcas de Carballiño e Ribeiro
O Consorcio Provincial de Incendio botará a andar o próximo día 1 de febreiro, segundo confirmou onte o seu presidente, Pablo Pérez, trala sinatura do contrato de concesión do servizo á empresa Veicar, despois de que se desestimara un recurso interposto por unha das empresas participantes no concurso diante do Tribunal de Recursos Contractuais. Esta decisión avala, segundo Pablo Pérez, o bo facer dos técnicos do Consorcio Provincial de Incendios.
O comezo da actividade deste Consorcio pon así mesmo enmarcha o Parque de Bombeiros de Carballiño-Ribeiro, unha vella demanda desta comarca. Segundo Pablo Pérez, este Parque será unha realidade no vindeiro mes de xuño. Como pasos previos, a partir do próximo día 11 de febreiro comezará o proceso de selección do persoal que se ocupará destas instalacións e o anuncio da convocatoria xa foi publicado no Boletín Oficial da Provincia.
A convocatoria foi realizada para cubrir un total de 31 prazas nos parques de bomberos da provincia. Dúas das prazas de bombeiros son para o parque de Valdeorras e unha para o parque de Verín. As restantes asignaranse ao futuro parque de bombeiros o Carballiño-Ribeiro e inclúen 1 xefe de servizo, 6 xefes de turno e 11 bombeiros. A maiores, a convocatoria do Consorcio inclúe a selección doutras dez prazas de bombeiros en situación de bolsa laboral.
Deste xeito cubrirase a precariedade coa que se están a atender os sinistros de incendios que se producen na comarca de Carballiño, un servicio do que se fai cargo nestes momentos o Grupo Municipal de Emerxencias, que está financiado íntegramente polo Concello carballiñés e que ten contratados a un total de once traballadores.
Despois do proceso de selección, os participantes que sexan seleccionados farán un curso de formación, cunha duración de catro meses, impartido pola empresa concesionaria do servizo.
