Arredor de 1.200 rapaces e rapazas pasaron onte pola Praza Maior para botar a lingua fóra, como colofón do Correlingua
Os alumnos de educación infantil, primaria e secundaria da provincia cantaron, xogaron e gozaron co Correlingua en galego por toda a cidade.
Nunha mañá en que madrugar pagou a pena, os máis pequenos concentráronse primeiro no Auditorio Municipal. Alí, os estudantes de 2º e 3º do CEIP O Couto gañáronse os corazóns do público entoando dúas cantigas. Os de secundaria faríano máis tarde cunha actuación de “break-dance” e tamén os grupos Run Run e Cuarta Xusta.
O que máis emocionou ós nenos foi a Camiñada Pola Lingua: nela os cánticos reivindicativos inundaron as rúas. A marcha estivo organizada en dúas quendas que remataron na Praza Maior para o mellor da xornada: unha competición de xogos que contou cos mellores tiradores de corda do mundo.
