David Fernández e Carlos Murias: “Temos xente nova e moi nova que fai boa música”

Co fin de dar a coñecer a música ourensá, David Fernández (guitarra de Stormseeds e Bágoa) e Carlos Murias (voz de Acidproyect) tiveron a feliz idea de crear #MadeinOU. Desde as redes sociais, en esencia Facebook e Instagram, e tamén con senllas listas en Spotify, dan protagonismo a todos e cada un dos artistas ourensáns. Tal é o seu compromiso que en 2021, en plena pandemia, autoimpuxéronse o reto de promocionar un artista por día, os 365 días do ano. E, claro, superaron a proba. A conclusión é que a música ourensá goza de boa saúde. “Hai moita vida!”, aseguran. Como e por que naceu #MadeinOU? Carlos: #MadeinOU nace no verán de 2019, froito do palique con David. Decatámonos do noso interese común polas músicas feitas na nosa terra no pasado e o presente, así como da pouca difusión e ensalzamento recibidos por estas. Así, propuxémonos tentar que as propostas feitas aquí chegasen a máis xente, utilizando as redes sociais, Facebook nos primeiros tempos, e dende hai un par de anos máis no Instagram. En base a que criterios deciden os contidos? Carlos: Tentamos que cada novidade que aparece teña o seu lugar, así como tamén procuramos facer a miúdo un exame de arqueoloxía musical para traer ata o presente artistas do pasado, con tremendas sorpresas que tivemos nalgunha ocasión. David: Eso mesmo, novidades, historia… e tamén moita información sobre concertos que se fagan na provincia. Obviamente non estamos enterados de todo nin estamos conectados as 24 horas, pero procuramos facer o que estea na nosa man. Canto feedback acadaron desde esta rede social cos músicos ourensáns? Contactan para difundir a súa música? David: Pois pouco a pouco vai aumentando a interacción entre as bandas e #MadeinOU. Cada vez etiquétannos máis e a verdade é que nos fai o traballo máis sinxelo. Enterámonos de proxectos interesantísimos grazas a estas mencións, e despois procuramos que ese proxecto chegue á maior cantidade de persoas posible. Carlos: No 2021 tentamos facer cada día unha publicación cun artista ou banda ourensán distinto, con bastante éxito por certo. Á xente encantoulle e ós músicos tamén. Seguro que nos esquecemos de moitos, pero é imposible abarcar todo o universo #MadeinOU, afortunadamente. E, efectivamente, si envían cousas novas para ser publicadas por nós, e nós felices. Vostedes son músicos, cal é a vosa opinión sobre o panorama musical ourensán actual? Carlos: Depende (risas). Se a comparamos coa efervescencia de algunhas décadas pasadas, tempos da Casa da Xuventude e demais, está claro que a situación non é a mellor. Pero os tempos mudan. Agora a batalla dáse moito no campo das novas tecnoloxías. Aí é onde vemos que hai xente nova, ou incluso moi nova, ou non tan nova, facendo música, e música obxectivamente boa. David: Persoalmente vexo unha escea moi sana, con moitas bandas de recente creación e con moi boa relación entre elas. Vexo moito apoio entre todas. Apoio xa sexa acudindo aos concertos ou compartindo contido nas redes. Existen tamén moitos proxectos que non nacen co fin de ser levados aos escenarios, e soamente existen virtualmente. Sexa no formato que sexa, hai moita vida!