A Xunta de Goberno da Deputación aprobou destinar máis de 668.000 euros a cooperar con concellos e entidades culturais, deportivas e veciñais. Baixo a presidencia de Luis Menor, a institución provincial deu luz verde ás bases reguladoras para a concesión de achegas ás asociacións veciñais para o financiamento da adquisición de equipos. Estas subvencións están dotadas con 30.000 euros e o prazo para presentar solicitudes remata o 20 de abril.
O goberno provincial tamén aprobou unha axuda de máis de 111.400 euros para o Concello de Ribadavia, coa fin de reformar a pista central do polideportivo municipal O Consello, entre outras destinadas a obras en diversos municipios. Outra das achegas destacadas que aprobou onte a Deputación vai destinada á Academia Galega do Audiovisual para desenvolver actividades. Ademais, a Asociación Deportiva Bosco Ourense recibirá 50.000 euros para gastos de funcionamento, idéntico destino dos 4.000 euros para a Escola de Baile e Música Tradicional da Asociación Cultural Rebulir.
