Valentín González Formoso: "Hai que percorrer Galicia, pero deixando pegada"

Valentín González Formoso é das Pontes pero presume de raíces ourensás, de onde é a familia do seu pai, “e onde naceron e morreron os meus avós”. Agora compite polo liderado dos socialistas galegos, cunha mensaxe de renovación nun partido que “perdeu conexión coa sociedade” e ten que loitar por ser “a primeira forza de Galicia”. Por que dá o paso? “Somos miles os compañeiros que entendemos a mensaxe da cidadanía galega logo do comportamento electoral dos últimos anos. A sociedade galega por primeira vez escolle ao PSdeG como primeira forza nunhas xerais para facer presidente do Goberno ao compañeiro Pedro Sánchez. Un ano despois, escollen aos socialistas para gobernar A Coruña, Ferrol, Santiago, Vigo, Lugo, cogobernar en Pontevedra, gobernar tres deputacións… Pero, en cambio, un ano despois lánzase unha mensaxe de desconexión na institución que máis inflúe na nosa vida: a Xunta. Hai que dar unha mensaxe de optimismo e insistir á cidadanía que o PSdeG sempre foi o vehículo onde se incorporaron as ilusións dos galegos”. Que fixo mal Gonzalo Caballero? Houbo un ensimismamento pola vida interna, olvidando a conexión coa sociedade. A permeabilidade cos colectivos sociais, culturais e cos tecidos produtivos necesita dedicación plena e máis intensa. Hai que percorrer Galicia, pero deixando pegada. Galicia debe percibir que o PSdeG está a defender os seus intereses en Madrid, con criterio propio, con lealdade ao Estado pero sendo conscientes dunha estrutura autonómica na que os territorios defenden intereses propios. A cidadanía percibiu que esa defensa foi menos intensa da que se lle esixe a un representante dunha forza galeguista, progresista, socialdemócrata e que ten os intereses de Galicia por bandeira. Fíxose unha lectura correcta das autonómicas? Hai unha falta de autocrítica seria. Díxosenos que non era mal resultado, que subiramos un 0,2%, olvidando que a cidadanía nos relegou ao terceiro posto. Tamén se nos di que Galicia é territorio do PP e que non hai que aspirar a gañar as eleccións. Non compartimos esa lectura desmoralizadora. É perfectamente posible gañar en Galicia, non hai que adscribir ideolóxicamente ningún territorio a ningunha forza política. Son alcalde das Pontes, goberno con maioría absoluta desde hai 14 anos, e non diría que é territorio socialista. Ten criterio propio. “É perfectamente posible gañar en Galicia” En que mudará as cousas? Na parte interna quero acabar coa descoordinación. Gobernamos as institucións máis importantes, salvo a Xunta, e o PSdeG ten que ter unha Conferencia Nacional anual na que poñamos enriba da mesa os asuntos estratéxicos. Agora estamos nun proceso de encarecemento da enerxía, e Galicia ten que ter papel protagonista. Hai que dicirlle ao Estado que temos criterio propio e crear foros permanentes onde oPSdeG se mostre útil á sociedade. Precisamos un PSdeG que se dedique máis a cuestións externas e que non estea resignado a ser terceira ou segunda forza no Parlamento e aspire a cambiar unha Galicia que cada vez é máis pequena. O PSdeG ten que ser a fórmula ilusionante, positiva e sen dramatismos. Como valora o labor de Rafael Villarino e os dous anos de xestora na cidade? O da cidade non é defendible. Hai que dar ilusión e optimismo a unha cidade protagonista por aspectos que non son exemplares. É un dos motores económicos, culturais e patrimoniais de Galicia. É unha provincia que ten catro das cinco Denominacións de Orixe no viño, con algúns dos grupos empresariais máis importantes de Galicia, un referente no téxtil… É unha pena que a súa bandeira, a cidade, estea mal gobernada e dando unha imaxe lamentable. E non é normal que esteamos celebrando eleccións en Cataluña e Madrid, que esteamos indo a mítines do partido e que a pandemia sexa escusa para non celebrar unha asemblea en Ourense e darlle a voz aos compañeiros. “A situación do partido na cidade é indefendible" Se gaña integraría os rivais? No meu ADN está integrar. Son secretario xeral na Coruña nunhas primarias onde se presentaron 7 candidaturas, das cales 5 se acabaron incorporando á miña. E a candidata alternativa está integrada na cúpula provincial. Non concibo iniciar un proxecto renunciando ao talento. Non podemos renunciar a un especialista nunha materia porque apoiou a Caballero, non podemos renunciar a Gonzalo Caballero en si mesmo. Renunciaría a alcaldía das Pontes ou da Deputación? Creo na delegación de equipos. Na Coruña duplicamos alcaldías, fomos primeira forza na provincia por primeira vez, recuperando A Coruña, Ferrol, Santiago… Delegando, creando equipos e aunando vontades é suficiente para compatibilizar cargos.