Unha das campañas en lingua galega do Grupo Cuevas, "Gústame ir ao súper", foi recoñecida entre as mellores dos últimos anos no Parlamento de Galicia, que acolleu este luns o acto de entrega dos XVIII Premios de Publicidade en Galego. A presente edición contou coa participación de 22 traballos nas cinco categorías de publicidade en prensa, radio, TV, internet ou centro educativo. O xurado outorgou os galardóns tanto á empresa anunciante como á axencia de publicidade responsable da campaña.
No ámbito de internet, a Comisión de Valoración quixo distinguir a campaña dixital "Gústame ir ao súper", elaborada pola axencia Neozink para o Grupo Cuevas, debido á súa "imaxe de normalidade, coherencia e compromiso no emprego do idioma". Recibiu o premio en nome da compañía o director xeral do Grupo Cuevas, Artur Yuste i Tarragó.
Pola súa banda, o presidente do Parlamento de Galicia, Miguel Ángel Santalices Vieira, lembrou o compromiso da institución co certame desde a disolución do órgano fundador, o Consello Asesor da RTVE Galicia. "Asumimos a remuda desde o noso firme compromiso coa lingua galega, tesouro e sinal de identidade", afirmou.
Ademais, Santalices valorou que a publicidade en galego non só constitúe un "compromiso coa cultura do país", senón que tamén o considerou "unha decisión intelixente e acertada" nas estratexias empresariais das entidades premiadas.