Un incendio sospeitoso

Os veciños do Alto da Cuña quedaron sorprendidos o pasado luns ao descubrir unha columna de fume ao carón dunha nave situada nun solar entre as rúa da Marquesa e o camiño do Arrodeo. Efectivos dos Bombeiros de Ourense e da Policía Local acudiron á orixe das lapas, un remolque de feira convertida en almacén que finalmente non puido salvarse e rematou completamente carbonizada. O propietario da estrutura, Adrián Conde, atopábase traballando na Coruña no momento en que as autoridades o chamou para notificarlle da súa perda e tomarlle os datos: “Recibes unha chamada da Policía e levas un susto de carallo”. Conde, feirante itinerante, volveu o martes á tarde coa súa familia á súa vivenda no Alto da Cuña para descubrir que non só perdera o almacén neste “desastre”, senón todo o que tiña gardado no seu interior, un conxelador, un forno, un aire acondicionado e roupa, entre outras posesións. “Non hai arranxo, hai que recollelo e limpalo todo o mellor posible, que non queda nada que aproveitar”, lamenta. O pouco alivio que ten Conde é que o incendio non fose a máis: as lapas puideron queimar a nave e a caseta colindantes, ou, no peor dos casos, o tráiler onde vive, a poucos metros dos restos calcinados. Sen conexión eléctrica Conde sinala que a chispa que iniciou o lume non puido deberse a un curtocircuito, xa que este almacén non estaba conectado á rede eléctrica. Así, mentres non teña máis información, sospeita dunha posible intencionalidade, aínda non sospeita de ninguén: “Sería unha persoa que non tiña nada que facer e aburríase”. Como el, moitos dos seus veciños son feirantes que, entre os meses de maio e outubro, viaxan a diferentes localidades cos seus postos e atraccións e, por tanto, nese medio ano pasan pouco tempo no Alto da Cuña. Con mes e medio de traballo por diante, Conde teme que o posible intruso poida volver prender as súas propiedades aproveitando a súa ausencia: “Intentaremos estar atentos; imaxínate que volve pasar mentres estamos fóra, non sabes que pode pasar”. Os habitantes da zona non viron nada sospeitoso o día dos feitos, pero apuntan que están a suceder roubos en vivendas. “Entraron na casa de varios compañeiros meus e nunha ocasión arrincaran a cámara de seguridade, sabían ao que viñan”, comenta Conde.