O presidente provincial, que lembrou que foi Miguel Santalices quen lle substituíu precisamente na vicepresidencia do Parlamento, desexoulle os mellores éxitos na súa nova etapa
O presidente provincial do Partido Popular de Ourense, Manuel Baltar, expresou hoxe a súa satisfacción e a dos populares ourensáns tras coñecer que o grupo parlamentario do PP propuxera por unanimidade a Miguel Santalices para a presidencia do Parlamento de Galicia.
“É o mellor presidente que podía ter a Cámara de todos os galegos”, dixo Manuel Baltar, destacando que esta proposta “é un recoñecemento á súa experiencia, ao seu coñecemento, o talante, o compromiso coa terra, o galeguismo e tamén á súa personalidade”.
O presidente provincial, que lembrou que foi Miguel Santalices quen lle substituíu precisamente na vicepresidencia do Parlamento, desexoulle os mellores éxitos na súa nova etapa, incidindo en que “se hai alguén capaz de presidir unha Cámara de representación política é el e así o recoñeceron hoxe por unanimidade todos os membros do grupo parlamentario popular”.
