Melania Cruz: “Penso que dicimos máis cunha mirada ou cun silencio que coas palabras"

A actriz lucense Melania Cruz chega ao OUFF como protagonista de "Arima", a primeira película da directora Jaione Camborda, que relata a vida de catro mulleres e unha nena cuxa vida se ve alterada pola chegada de dous forasteiros á vila. A intérprete galega chega a un festival que non lle é alleo: en 2017 protagonizou a aclamada "Dhogs", de Andres Goteira. Esta nova historia, na que as miradas superan os diálogos, forma parte da sección Panorama Galicia e poderá verse mañá ás 17,00 horas no Teatro Principal. Como é Julia, a túa personaxe en “Arima"? Ten varios conflitos sen resolver. Por unha banda, a desaparición do seu irmán e por outra, unha relación particular coa súa nai porque hai moitas cousas non ditas e non expresadas que se van enquistando co paso dos anos. Convértense en cuestións que van afectando á personaxe, facendo que non poida levar adiante a súa vida dunha maneira máis feliz. É unha protagonista con poucos diálogos, moitos silencios. Foi un reto interpretativo? Si. Penso que dicimos máis cunha mirada ou cun silencio que co que chegamos a transmitir coas palabras. Moitas veces, as palabras minten máis que algúns xestos. É unha película que se centra máis en como as personaxes, especialmente as femininas, van recibindo o universo que as rodea a través da súa mirada. É unha película que fala moito máis da ollada, do non dito, que do que dicimos. A película xa se viu noutros festivais. Que din dela? É a primeira longamentraxe de Jaione Camborda, unha directora moi intersante porque ten unha traxectoria diversa. A recepción foi moi positiva. É unha película de autor, pero é moi suxerente porque é moi aberta. Ante a falta de diálogo, o espectador ten que contar coa súa propia bagaxe para encher todos eses ocos en branco que moi conscientemente a directora vai deixando durante a película. É un bo momento para o cine en galego? Calquera momento é bo para o cine galego. Estamos vivindo un momento moi complexo para todos os sectores e o cultural sempre é dos que se ven resentidos. Pero o cinema galego leva unha traxectoria moi interesante e está nun momento no que a ilusión da xente por contar as súas películas e facer o cine que quere está superando obstáculos. Estaría ben que tivera máis apoio institucional. En que proxectos está á parte deste filme? A piques de estrear "Ons", o último filme de Alfonso Zarauza que coprotagonizo con Antonio Durán "Morris". Continuo no teatro con "Empapelado amarelo" e con " Medida x medida".