A ceramista de Cambre (A Coruña), Laura Delgado, acaba de gañar a máxima categoría do Premio Artesanía de Galicia, dotado con 9.000 euros, cunha obra inspirada no entroido de Ourense.
O proxecto “O mundo do revés, coctelería peliqueira” da gañadora combina os vasos tiki polinesios con elementos do entroido ourensán. “Combina dúas ideas un pouco tolas que tiven unha noite”, confesou a artista durante a entrega do premio. A obra da ceramista cambresa impúxose a outros tres finalistas, os talleres lucenses Santiago Besteiro Design e Ezequiel Franchi, de Monterroso e Ribadeo, respectivamente, así como a Verónica Moar Cerámica. O galardón outorgouse nunha gala celebrada onte nun hotel en Santiago de Compostela.
O acto contou coa presenza do presidente da Xunta de Galicia, Alfonso Rueda, que subliñou “o talento e a capacidade da artesanía galega para xerar produtos con personalidade e valor engadido no mercado global”. O sector da artesanía conta en Galicia con 3.300 profesionais e cerca de 800 talleres que dan emprego a 7.800 persoas.
