En Ourense Alba Garrido publica un libro sobre as vítimas de Galicia que pasaron polo campo de concentración de Mauthausen
Alba Garrido (Ourense, 1997) é graduada en Historia. Investiga o exilio republicano e as traxectorias vitais dos galegos deportados aos campos de concentración da Alemaña nazi. Foi a través do seu Traballo de Final de Máster como xurdiu a idea de ir máis alá. Esta moza acaba de publicar “De Galicia a Mauthausen” (editorial Galaxia), un traballo de investigación histórica que procura dar luz sobre as orixes, os contextos e as traxectorias dos galegos que remataron nos campos de exterminio. Segundo os datos coñecidos, polo menos 35 ourensáns pasaron por Mauthausen.
“Vin que estaba pouco traballado o tema en Galicia, en comparación con outras comunidades autónomas. Está máis estudado o exilio intelectual, que é evidente, pero hai multitude de enfoques”, conta Garrido sobre a súa investigación.
Esta moza ourensá, que xa prepara as presentacións do libro, atopou 208 vítimas galegas nos campos de concentración nazis. A Coruña rexistra 83, Ourense 47, Lugo 36 e Pontevedra 32.
“No caso das vítimas ourensás as procedencias son da cidade, Entrimo e Monterrei”, apunta.
No libro “De Galicia a Mauthausen” analiza as orixes e o perfil socioeconómico dos galegos que estiveron en Mauthausen. Atopou un perfil común, como que a maioría era do rural e cruzou a Francia trala Guerra Civil. No país veciño traballaron na liña Maginot, ao longo da fronteira con Alemaña e Italia.
Alba Garrido, apaixoada da Historia, é consciente de que o tema ten moitas liñas de investigación abertas. Continuará estudando a pegada galega nos campos de concentración. Santiago, Betanzos e Vilagarcía serán as primeiras paradas da presentación do seu libro. “De Galicia a Mauthausen” está a venda en calquera librería.
