"O PSdeG fai dimitir a Orozco por estar imputado e agora forza o nomeamento de Besteiro ao Senado porque está imputado. Incoherencia total", publicou o exdirixente socialista
O exsecretario xeral do PSdeG Pachi Vázquez cargou este xoves contra a "incoherencia" do seu partido, ao que recrimina "forzar o nomeamento" do seu actual xefe de filas, José Ramón Gómez Besteiro, como senador por designación autonómica ao estar imputado.
"O PSdeG fai dimitir a Orozco por estar imputado e agora forza o nomeamento de Besteiro ao Senado porque está imputado. Incoherencia total", publicou o exdirixente socialista na súa conta persoal de Twitter, que en datas recentes utilizou tamén para criticar a confección das candidaturas do seu partido ás eleccións xerais na súa provincia, Ourense.
Co seu escrito na rede social, o exconselleiro de Medio Ambiente durante a etapa do bipartito aludiu á posibilidade de que Besteiro asuma un escano na Cámara alta por proposta do Parlamento galego, co que resultaría aforado e o seu caso pasaría do despacho da xuíza Pilar de Lara aos do Tribunal Supremo.
Como confirmaron fontes próximas ao líder socialista, a do Senado é "unha opción" que está sobre a mesa, se ben non é "a preferida" por Besteiro. Polo momento, a defensa do lucense xa presentou un escrito á Audiencia Provincial no que demanda que se retire á maxistrada da súa causa por entender que se trata de asuntos xa "investigados" e "arquivados".
En días pasados, en distintas entrevistas, Pachi Vázquez sostivo que Besteiro "non está en condicións de ser o candidato ao Goberno galego" nin de seguir sendo o secretario xeral do PSdeG dada a súa imputación e as crises abertas no seo do partido.
