Gobernos galego e local colaborarán na humanización da zona. Para desenvolver a actuación asinouse un convenio entre ambas as institucións, acordo que foi ratificado pola conselleira, Ángeles Vázquez, e polo naquel momento alcalde do municipio, Manuel Pedro Fernández.
Segundo os datos facilitados pola consellería, o proxecto contará cun investimento de máis de 125.000 euros e a Xunta achegará o 70% dos fondos necesarios para facelo realidade. O outro 30% correrá por conta do Concello de San Cibrao das Viñas. A actuación enmárcase dentro dos proxectos promovidos en base ao plan Hurbe, un programa impulsado polo Goberno galego que ten como finalidade axudar ás administracións locais a financiar actuacións nos municipios que incidan de forma positiva na calidade de vida dos veciños.
O prazo de execución dos traballos será de tres meses e as obras “consistirán na substitución do pavimento actual por un novo con lastro de granito colocado con morteiro de cemento, na instalación dunha nova varanda, na reparación das escaleiras de pedra e da fonte, e na limpeza do muro de pedra. Ademais, colocaranse bancos de pedra, papeleiras e macetas”.
