A prevención dos lumes triplica o seu orzamento en Ourense

O conselleiro do Medio Rural, José González, e o presidente da Deputación de Ourense, Luis Menor, asinaron onte na sede do organismo provincial un protocolo de colaboración para avanzar en materia de prevención de incendios forestais. Este convenio ten un orzamento de 3,8 millóns, o que supón case triplicar o importe do acordo anterior e céntrase na realización de actuacións conxuntas para o mantemento e a conservación das infraestruturas preventivas e da contorna agrofororestal no territorio provincial. Destes fondos, a Deputación aportará un máximo de 1,3 millóns de euros e a Consellería os 2,5 millóns restantes. Entre as intervencións previstas figuran os traballos de roza de matogueira para xestionar a biomasa, a mellora da xestión do persoal adscrito aos concellos da provincia en materia de defensa contra incendios, a adquisición de ata 12 tractores rozadoiras, así como de maquinaria motoniveladora ou a cesión, por parte da Deputación, de maquinaria da súa titularidade aos concellos para tarefas preventivas. Novidade Ademais, como novidade, poranse en marcha catro programas piloto para dotar cun total de 16 brigadas de prevención e extinción de incendios por seis meses a outras tantas mancomunidades municipais da provincia. Trátase das do Ribeiro, Terras de Celanova, Comarca do Carballiño e Comarca de Verín. A maiores, darase formación especializada ao persoal municipal e das mancomunidades a través do Centro Integral de Loita contra o Lume de Toén. Trala sinatura do convenio, o conselleiro salientou que este esforzo demostra o compromiso de ambas partes na prevención do lume e o interese por darlles aos concellos ourensáns un papel protagonista neste eido. González lamentou “a falta de compromiso das deputacións da Coruña e Lugo para participar nunhas tarefas nas que teñen obriga legal de intervir, colaborando cos seus concellos”. Así mesmo, o presidente provincial, Luis Menor, puxo en valor a importancia de “reforzar e mellorar os labores de prevención no territorio, fortalecendo tamén a cooperación cos concellos, dotándoos de medios materiais e formación especializada ao seu persoal”.