O conselleiro de Sanidade, Jesús Vázquez Almuíña, admitiu un "atraso" na ampliación do Complexo Hospitalario Universitario de Ourense
O conselleiro de Sanidade, Jesús Vázquez Almuíña, admitiu un "atraso" na ampliación do Complexo Hospitalario Universitario de Ourense (CHUO), pero avanzou que "a principios de setembro" o novo edificio de hospitalización terá unha ocupación do "cento por cento", para o que se planifica o seu traslado.
En resposta a unha pregunta do PSdeG, Almuíña sinalou que estes atrasos están derivados da anulación do Plan Xeral de Ordenación Municipal (PXOM), unido aos problemas de subministración eléctrica e nos viarios de acceso.
"Cando hai problemas hai que emendalos e iso implica atrasos", xustificou o conselleiro. Con todo, destaca os 24.000 metros da área de hospitalización e garante que "vai ser un magnífico edificio".
Pola súa banda, a deputada socialista Noela Blanco tachou de "verdadeira chapuza" a obra de ampliación do hospital.
