O obxectivo deste espazo de emprendemento, promovido pola EOI e o Igape, é avaliar as ideas de negocio, formar os emprendedores en novos campos e aumentar as probabilidades de éxito dos seus proxectos. Tamén daranse a coñecer os diferentes instrumentos e apoios para testar unha idea de negocio e así impulsar o emprendemento na provincia de Ourense.
A Escola de Organización Industrial (EOI) e o Instituto Galego de Promoción Económica (Igape), no marco do programa GO2WORK, están a organizar unha serie de coworkings para favorecer o emprendemento en sectores estratéxicos da nosa Comunidade. A última convocatoria é o coworking de Ourense, centrado en calquera sector.
O devandito espazo, que terá unha duración de cinco meses, contará con varias actividades que axudarán aos emprendedores a avaliar a súa idea de negocio, formalos en novos campos e aumentar as súas posibilidades de éxito. Dentro destas actividades organizaranse obradoiros prácticos, demoday (presentación ante investidores), mentorización ou networking, entre outros. Ademais, os participantes terán todas as súas necesidades cubertas (zonas comúns, sala de reunións, wifi, impresora...), dado que a actividade é gratuíta. O obxectivo fundamental é aumentar as posibilidades de éxito de proxectos innovadores e facilitar a obtención de apoio para poñer en marcha estes proxectos en pouco tempo.
Estas actividades están destinadas, principalmente, a emprendedores cunha idea de negocio sen desenvolver ou cun proxecto empresarial en fase temperá de desenvolvemento (iniciado non máis de 6 meses antes da súa participación no espazo de coworking) así como estudantes ou novos titulados que queiran prepararse para o mercado laboral a través do emprendemento.
A inscrición pode realizar no seguinte enderezo de correo electrónico [email protected] ou no teléfono 986 419 922 (extensión 2004).
Resultados dos coworkings da EOI e o Igape
Ao longo dos catro últimos meses xeráronse máis de 120 ideas de negocio nos sete espazos de coworking habilitados en Galicia pola Escola de Organización Industrial e o Instituto Galego de Promoción Económica. Por iso, recentemente o conselleiro de Economía e Industria, Francisco Conde, explicou que a idea é convocar dúas edicións máis, de cinco meses de duración cada unha delas, ao longo do ano que vén. Así, esta aceleradora axudará a que frutifiquen ata 60 proxectos empresariais promovidos por case 200 emprendedores grazas ao servizo de asesoramento que recibirán con esta iniciativa.
Os devanditos espazos de emprendemento cotan co financiamento da Unión Europea – Programa FEDER 2014-2020.
