O consello regulador da denominación de orixe Ribeira Sacra lamenta que, polo menos de momento, ningunha das institucións que promove a declaración desta comarca como Patrimonio da Humanidade informase o sector vitivinícola sobre as consecuencias que podería ter para a súa actividade económica esta distinción.
Nunhas declaracións á EFE, o presidente do consello regulador, José Manuel Rodríguez, lembrou que o sector merece explicacións sobre as consecuencias que pode traer consigo esa declaración canto ao desenvolvemento da principal actividade económica desta zona, entre as provincias de Lugo e Ourense.
'O grande atractivo da Ribeira Sacra, esa paisaxe, é propiedade e está sustentado por miles de viticultores', explicou Rodríguez, polo que o consello regulador pide, en representación dese sector, 'unha información de primeira man sobre como vai afectar a declaración como Patrimonio da Humanidade'.
Segundo Rodríguez, o sector vitivinícola da comarca ten dereito a saber se esa declaración vai traer consigo 'determinados incentivos económicos ou será un escollo máis para o desenvolvemento desta actividade'.
'Isto é atractivo, porque parece que é algo que se esquece, porque hai unha xente que traballa e sostén todo este territorio coa súa actividade, mais non ao revés', insistiu.
Do seu punto de vista, 'polo menos habería que xuntarse con este sector e explicarlle en que medida o afectará a posible declaración e que condicións vai implicar a cualificación como Patrimonio da Humanidade para o territorio no seu conxunto'.
Rodríguez confirmou que, polo menos de momento, ningún dos 'organismos' que promoven esta candidatura se dirixiu ao consello regulador para 'explicarlle nada'.
'Leo nos medios de comunicación que hoxe se asina un protocolo' para promover esa candidatura e 'asínano tres organismos, dúas deputacións e un consorcio de turismo', mais 'o consello regulador non aparece de ningunha maneira'.
