O afiliado de Compromiso por Galicia Xosé Mosquera foi elixido o pasado domingo como cabeza de lista de Ourense en Común para as próximas eleccións municipais, con 435 votos por 407 de Miguel Doval.
O afiliado de Compromiso por Galicia Xosé Mosquera foi elixido o pasado domingo como cabeza de lista de Ourense en Común para as próximas eleccións municipais, con 435 votos por 407 de Miguel Doval. En canto á candidatura, e en base aos criterios de paridade, o número dous é para Ana Bande, o tres para Martiño Xosé Vázquez, o catro para Ledicia Piñeiro, o quinto sería Miguel Doval -que se quedou a só 28 votos de ser cabeza de lista- e o sexto para Tania Bouzo. Ata o mércores está aberto o prazo para posibles reclamaciones sobre o resultado destas Primarias, que sumaron 1.586 votos entre o sábado e o domingo. Hoxe, ás oito da tarde, haberá unha asemblea para analizar a votación e empezar a pechar o programa electoral co que esta marea ourensana presentarase aos próximos comicios municipais do vindeiro mes de maio na cidade.
Que lle pareceu ser o elixido como cabeza de lista?
Creo especialmente relevante que 1.586 persoas participen libre e desinteresadamente neste proceso. En canto ao feito de que eu reciba uns cantos votos máis que outra candidatura, non o considero moi significativo. Alguén tiña que ser o portavoz desta iniciativa e fun elixido para iso, pero só son un máis nun proxecto plural.
Cre que influirá no futuro programa da formación a súa conexión con Compromiso por Galicia?
Que estivera previamente nunha formación política non condicionará o programa, que se elaborará coas ideas que habemos ir recollendo entre os veciños dos distintos barrios da cidade e as achegas dos que formamos Ourense en Común. O obxectivo é conseguir un proxecto para todos. Desde o momento que decidimos suscitarnos unha candidatura colectiva, vindo de diferentes procedencias políticas ou ideolóxicas, eramos conscientes de que sería un programa elaborado entre todos.
Hai aberto un prazo para presentar posibles reclamaciones Ve posible a presentación dalgunha?
Creo que onte -polo domingo- púxose fin a un proceso moi laborioso, o reconto fíxose contrastando cada voto e, desde o punto de vista aritmético, non hai moita marxe para o erro.
Poderíanos adiantar algo do que ten en mente para ese programa electoral?
Teño na cabeza cousas e todas encamiñadas a que a cidade funcione, pero hai que poñelas en común. Si teño claro que debemos aternos aos principios de compromiso ético, transparencia política, un Concello ao servizo de todos e atención aos máis desfavorecidos.
E cal é a súa previsión de voto nas municipais do mes de maio na cidade?
A participación rexistrada nestas Primarias pode sorprender a algúns, pero, en todo caso, reflexa que había realmente unha demanda dunha marea ourensana como a que se puxo en marcha para dar máis protagonismo á cidadanía na xestión do Concello. Por outra banda, teño a sensación, logo de falar con diversos colectivos de distintas ideoloxías e sensibilidades, que esta idea, creada polos propios cidadáns desde abaixo, crecerá exponencialmente. Ata onde? Haberá que velo nas próximas eleccións municipais de maio.
