Trala ampla participación acadada en 2010, o certame Minicontos De Luns a Venres Outono celebra a súa segunda edición co fin de continuar fomentando a lingua e a literatura galegas. A Secretaría Xeral de Política Lingüística colabora co certame, que promoven o Centro PEN de Galicia e o xornal LV. De Luns a Venres.
Este concurso de relatos breves pretende impulsar a presenza da literatura galega nos medios e busca achegarlles aos lectores as obras dos autores que escriben en galego. Trátase dunha iniciativa para ampliar os horizontes da lingua e da cultura galegas. As persoas interesadas poden participar no concurso ata o 15 de decembro. Os traballos, que deberán ser inéditos e estar escritos en galego, non poderán exceder os 1.200 caracteres. O concurso premiará os tres mellores minicontos.
