"Rosa de España"

Así bautizouna o cantante Alejo Stivel, e así seguírona alcumando varias xeracións de seguidores de diferentes idades no momento en que Rosa López gañaba a primeira edición de Operación Triunfo alá polo ano 2002, ou cando participou no Festival de Eurovisión de Tallín pouco despois, acompañada nos coros, con simpática e "atrapallada" coreografía, polos seus compañeiros de Academia, Bisbal, Chenoa, Bustamante, Geno e Gisela, conseguindo un meritorio sétimo posto e un seguimento de máis de 14 millóns de espectadores no momento das votacións, con gran desgusto da maioría deles pola posición acadada, descubrindo por primeira vez as particularidades dun Festival, o de Eurovisión, que algúns de nós temos como referencia anual como outros teñen a final da "Champions League". Foi, en calquera caso, o programa máis visto na historia da televisión en España ata a final da Copa do Mundo de Fútbol de 2010. Pois esta estupenda Rosa vai estar hoxe con todos nós no "Bamboleo", falando do que lle pete e cantando algunhas cancións que lle pedimos que interpretara, como esa recreación marabillosa do "Yo no soy esa" da gran Mari Trini, quen debeu ter sido a nosa Edith Piaf se este País fora como Francia e non esquecera tan pronto as grandes divas da canción e doutras disciplinas, e se deixara de encumbrar a quenes teñen por oficio ofrecer "urbi et orbi" como gran mérito persoal e profesional os seus líos de alcoba. Tamén nos cantará a versión do "A quien le importa" de Alaska y Dinarama, que gravou con motivo da celebración do WorldPride 2017 na madrileña Porta de Alcalá, canción que quedou como hino oficioso do movemento LGTB. Tamén escoitaremos algo máis recente da intérprete granadina como o single "Vacío", que daría título á xira de verán se non fora por este maldito virus; aínda que Rosa non se rende e vai comezar en setembro unha xira de concertos en acústico. Nas charlas con ela é mellor non ter guión preestablecido, xa que a súa espontaneidade pode levar a conversa por derroteiros ben distintos aos previstos; sabe que aquí soamente falamos do que a ela lle apeteza, e iso dalle moita tranquilidade aos artistas, e sobre todo a esta muller que pasou por momentos un chisco complicados ao longo da súa exitosa carreira, chea de discos de ouro e platino e galardóns tan importantes como a Medalla de Ouro de Andalucia. Ben é certo que ás veces os artistas que saben da nosa filosofía á hora de facer televisión sorpréndenos con confidencias non previstas, como foi o caso de Natalia a pasada semana falando de pequenas e confesables interioridades da Academia de O.T. Ademáis da gran Rosa, tamén estará un xoven dúo galego estupendo que está cautivando a milleiros de seguidores nos seus concertos e nas redes sociais, trátase de "Verto", un grupo compostelán que naceu aínda non hai un ano e que conseguíu facer dos seus singles e do seu disco "Puro Ocio" auténticos "hits", como o "Oie Gayego". Xa sabedes do moito que nos gusta aos que facemos o programa ofrecer un dos nosos escenarios a todo o artisteo emerxente que trae necesarios aires novos e frescos que combinan perfectamente cos artistas xa consagrados e que conforman un elenco marabilloso no noso idioma. Para non perder tampouco hoxe na sección de baile a actuación de Antoni e Melanie, fantásticos campións do mundo de Bachata.