A cota de neve situarase a partir dos 1.200 metros
Galicia permanecerá este mércores baixo a influencia dun sistema de borrascas que se move polo Atlántico Norte cara ás Islas Británicas. Así, os ceos estarán moi anubrados, con chuvias que comezarán durante a mañá na zona oeste e se xeneralizarán a partir do mediodía.
Segundo a información de Meteogalicia, os ventos soprarán do sueste, moderados, alcanzando intensidade forte pola tarde, principalmente no litoral e en zonas altas.
As temperaturas ascenderán, especialmente os valores máximos, e a cota de neve situarase a partir dos 1.200 metros. Por cidades, as máximas estarán entre os 15 graos de A Coruña, Ferrol, Pontevedra e Vigo e os 13 de Lugo e Santiago, mentres que as mínimas oscilarán entre os 4 graos de Lugo e os 11 de A Coruña.
