O científico Mariano Lastra comanda un equipo que procurará analizar os procesos ecolóxicos da descomposición das algas na Illa Decepción da Antártida.
A experiencia do científico da Universidade de Vigo Mariano Lastra e do seu equipo na Antártida é ampla e profunda. Tras cinco campañas previas, un novo proxecto financiado polo Ministerio de Economía e Competitividade tratará de analizar os procesos ecolóxicos e bioxeoquímicos asociados á descomposición de algas nos intermareais sedimentarios de Porto Foster, na Illa Decepción da Antártida.
O proxecto comprende dúas campañas científicas na zona, a primeira na que participará un equipo de cinco investigadores das universidades galegas, tres da Universidade de Vigo (Mariano Lastra, IP do grupo, Jesús López e Adoración Sánchez) e dous de Santiago de Compostela.
O obxectivo é crear un modelo para predicir o efecto da actividade xeotérmica no litoral antártico e encádrase na Campaña Antártica do Exército de Terra 2015/2016, que acada a vixésimo novena edición e que se presentou na sede da Vicerreitoría do campus de Pontevedra. A XXIX Campaña Antártica Española durará 100 días e comprende 20 proxectos de investigación e nelas participarán arredor de 100 científicos.n
