A primeira Feira das Montañas de Trevinca chegou onte ao seu fin cun grande éxito de participación e un municipio, A Veiga, volcado para exhibir a súa produción local, especialmente, a mel e as fabas lobas. Ducias de persoas visitaron durante a fin de semana os expositores instalados na Praza do Pulpo e asistiron a diferentes "shows" culinarios. Tamén puideron degustar tapas das Montañas de Trevinca en diferentes locais de A Veiga e catar mel dos apicultores da zona grazas á Indicación Xeográfica Protexida Pataca de Galicia.
A segunda e derradeira xornada do evento comezou coa apertura dos stands e un "showcooking" que correu a cargo de Anxo, cociñeiro do restaurante A Viuda de Trives,que empregou o mel das Montañas de Trevinca. Rematou, ademais, cunha degustación. A continuación, ás 12,30 horas tivo lugar unha charla sobre boas prácticas agrícolas, que estivo impartida por técnicos do Inorde e, ás 17,00 horas, celebrouse unha nova demostración de cociña con fabas lobas.
A primeira edición da Feira das Montañas de Trevinca rematou a media tarde e, durante toda a fin de semana, participaron nela máis dunha vintena de apicultores e agricultores. O rexedor local, Juan Anta, loubou o papel destas persoas e o compromiso de todos os veciños co evento.
