A Gudiña organiza as I Xornadas pola memoria e xustiza

A Asociación Cultural Os Torgueiros da Gudiña organiza as súas primeiras “Xornadas pola Memoria, Xustiza e Reparación”, nas que se homenaxeará a Xose Luís Bouzas, o mestre de Flariz asasinado na Poula do Martiño, en Pentes; e a Anunciación Casado, A Pasionaria de Viana, asasinada na curva das Revendeitas, que terán lugar o sábado 19 e domingo 20 de agosto na Casa da Viúva, na Gudiña. As xornadas comezarán o sábado 19 de agosto ás 18,00 horas da tarde na Casa da Viúva. Dionisio Pereira, historiador de longa traxectoria e múltiples publicacións relativas aos movementos sociais na Galicia contemporánea, encargarase de presentar, xunto ao etnógrafo gudiñés Xosé Rodríguez Cruz, a palestra “Achegas sobre a primixenia guerrilla antifranquista na raia das Frieiras e Tras-Os-Montes”. Xosé Lois Santiago Rodríguez, que actualmente coordina e investiga no proxecto, Exhumación de represaliados portugueses en Portocamba-Campobecerros, presentará pola súa parte “Os derradeiros días da República na Gudiña”, onde fará unha crónica dos feitos históricos acontecidos na Gudiña dende o 17 o 24 de xullo de 1936. A continuación, contra as 8 da tarde, terá lugar un evento de música ao vivo, coas actuacións dos pontevedreses Columna Vegana, e O’Leo de Matamá, na terraza da Casa da Viúva. As xornadas continuarán o domingo 20 ás 12,30 no cemiterio de Pentes, onde terá lugar unha ofrenda floral e homenaxe ao mestre de Flariz, Xosé Luís Bouzas, asasinado vilmente na Poula do Martiño, nesta mesma aldea. As homenaxes continuarán no cemiterio do Castro, en Viana do Bolo, onde se atopa o corpo de Anunciación Casado, asasinada nas Revendeitas, paraxe entre A Gudiña e o municipio vianés. Tras as actividades, a xornada rematará cunha comida de confraternización para os participantes desta primeira “Xornadas pola memoria” baixo o lema “Xustiza e Reparación”.