O vindeiro día 29 de xuño, día de San Pedro, Padroeiro da parroquia de Trasalba, procederase á entrega de premios do Concurso de poesía “Xamón, Pan e Viño” convocado durante o confinamento pola Fundación Otero Pedrayo e co patrocinio de COREN, VIÑA COSTEIRA e INDICACIÓN XEOGRÁFICA PROTEXIDA PAN DE CEA.
O acto que se celebrará na biblioteca da Casa Grande de Cimadevila, ás 12,30 da mañá, contará cunha presenza reducida (ao redor de 20 persoas, entre premiados, organizadores e convidados) e será retransmitido en vivo pola canle de youtube da Fundación.
Lembramos que os tres premios consisten en vales de produtos dos patrocinadores por importe de 1200, 700 e 300 euros, e que tamén se entregarán dous accesits con publicacións da Fundación a outros dous finalistas.
Os gañadores foron:
1º Premio ó poema “Conxurándonos”, presentado por Lucía Durán Paredes, de Moaña, Pontevedra.
2º Premio á composición “3 sonetos”, presentada por Manuel Martí Figueiras, de Cambeo, Coles, Ourense.
3º Premio ó poema “Feitos de sal e terra”, presentado por Miguel Anxo Alonso Diz, de Vigo, Pontevedra.