En 1978, Fernando Fernán-Gómez ganou o Premio Lope de Vega do Concello de Madrid coa súa obra As bicicletas son para o verán. Aínda cando o premio comportaba a súa estrea inmediata, por criterios administrativos tardouse cinco anos en autorizala. Cando o fixo, esta “comedia de costumes”, segundo o autor, obtivo un extraordinario éxito e unha afluencia pouco común de espectadores, como contou un crítico dun xornal español e que non dubidou en cualificar como “obra mestra” este sainete dramático que xira en torno a unha familia de clase media durante a Guerra Civil, circunstancia que lle dá a esta comedia unha dimensión profunda, especialmente a través de don Luis, o pai, “personaxe riquísimo de ideoloxía subxacente”, que o escritor Francisco Umbral definiu como “un madrileño anti-Arniches, ou un Arniches pasado por Gorki, un home temperado, de humor a punta seca, eficacísimo, o mesmo humor coloquial do propio Fernán-Gómez”.
Non é de estrañar que o cine se interesara pola obra. Os produtores Alfredo Matas e José Vicuña encargáronlle o guión a Salvador Maldonado e a dirección a Jaime Chávarri; ambos acababan de obter un bo éxito con Bearn ou a sala das monecas, galardoada no festival de Montreal. Do reparto teatral respectaron a Agustín González, que lle dera vida a “un personaxe extraordinario, unha auténtica creación humana con solvencia e calidade de gran actor”. González recibiu por esta película varios premios.
Segundo Molina Foix, “Chávarri consegue transmitir a densa e emporiso case imperceptible textura dramática que constituía a grandeza do espectáculo teatral: a pintura de cómo un acontecemento histórico irrompe entre os individuos dunha comunidade, altéralles e modifica as súas vidas, xa nunca máis iguais”.
Jaime Chávarri sorprendeuse de que lle ofreceran a el dirixir a película, toda vez que o autor da obra é un recoñecido director de cine e de teatro, pero Fernán-Gómez comentara que non quería saber nada da película. Cando se estreou en 1984 convocou a dous millóns de espectadores, situándose entre as de maior éxito do cine español.
