Desde 2005, com grande acerto, ANPE vem desenvolvendo na nossa cidade cada ano, no mes de outubro, a Jornada de homenagem aos docentes. Na que, sem discriminar a ninguêm, como deve ser, se homenagea aos docentes que se reformam ou jubilam. E se dam as bem vindas aos que se incorporam a este nobre ofício de ensinar aos demais. Tambem anualmente se escolhe um docente para receber a homenagem de todos. Polo seu labor prolongado e positivo ao largo dos anos. Que, de alguma maneira, seja o espelho no que devam olhar-se os novos professores. O sábado dia 17 do presente mes de outubro, no incomparável marco do nosso Teatro Principal, teve lugar a quinta ediçom da jornada que comentamos. Igual que nas anteriores, estivem presente em corpo e alma. E sempre estarei ao lado dos mestres e mestras. Que, junto com o dos médicos, o seu ofício é o mais importante que existe na sociedade. Este ano a homenagem central recaeu na que, durante muitos anos, com um modélico labor pedagógico, foi inspectora de ensino, a lucense e ourensana de adopçom, Mª Fernanda Valcarce Pestanha. Foi um prazer escoitar o seu pequeno, mas profundo, discurso e ver o bem que mantem a sua lucidez didáctica e mental.
Damos os parabéns ao actual Conselheiro de Educaçom, Jesús Vázquez, por estar pre sente, do princípio ao fim do programa de actos. Ao lado dos mestres, que é o seu dever prioritário, em jornada tam importante como emotiva. O que nom fez, por exemplo, em anos anteriores, a triste conselheira anterior que, sem merece-la, nos tocara em sorte. Felicitamos ao conselheiro tambem polo seu lúcido e profundo discurso, pronunciado no nosso belo idioma.
No idioma de Curros, de Rosália, de Pondal e Castelao. Acertadamente falou de galeguismo, dos nossos próceres da geraçom Nós. Vinculando o tema com o grande valor do ensino, a infância e a juventude. E os mestres e mestras como a verdadeira alma das aulas e centros de ensino. Que necessitam mais apoio e reconhecimento social no seu labor. E que o código penal se reforme para que os professores tenham o status de autoridade pública. Nom sem antes reclamar um grande pacto estatal pola educaçom. No que todos vaiamos de maos dadas. Pois a educaçom está por cimo de partidos, sindicatos e ideologias. É um bem social para todos os cidadaos. Terminado o acto, todos juntos realizamos a foto anual perante a estátua do nosso Padre Feijóo. E marchamos a celebrar o jantar de irmandade. Que foi encerrado com singelas e acertadas palavras do mestre José Luis Baltar. Pois, a Deputaçom que preside apoiou sempre esta jornada anual dedicada aos docentes.
Eu quero aproveitar para solicitar à actual Conselharia, que dirige o ribadaviense e ourensano professor Vázquez que, quanto antes, organize uma magna campanha de apoio aos docentes de todos os níveis educativos. Que desde há muitos anos eu venho reclamando que se leve a cabo na Nossa Terra. Acompanhada do necessário apoio à mesma desde todos os meios de comunicaçom: rádio, imprensa galega e, especialmente, as televisoes. Sem esquecer tampouco o apoio decidido, sem sectarismos, à formaçom permanente ou em exercício dos docentes. Tam esquecida, como importante. A renovaçom pedagógica das nossas escolas nom pode esperar.
(*) Professor Numerário da Faculdade de Educaçom de Ourense
