O adágio de que a ignoráncia é muito atrevida, no caso da ex-conselheira de educaçom, que quere ser a futura reitora da universidade compostelana, cúmpre-se às mil maravilhas. Em vez de nomear no seu dia a uma pessoa para cárrego tam importante, que dominasse o amplo campo da educaçom, (e no seu partido havia muitas), o mediocre Tourinho, escolheu a uma triste professora de genêtica dos animais. Triste, ademais, em todas as acepçoes do termo. Saber de genêtica nom é saber de educaçom e assim, ao final, resultou ser a pior gestora educativa da história da nossa autonomia, desde que contamos com Junta. Com gravíssimos erros e decissoes muito equivocadas, ao largo do seu mandato. Com uma equipa colaboradora aínda pior que ela, da que só salvamos o responsável da FP. Mesmo o Secretário Geral Técnico teve que defender em muitos momentos o que era indefendível. A lista de desacertos é imensa e daria para uma novela ou monografia. Entre outros, a mudança do horário de junho e setembro em infantil e primária, sem demanda nem necessidade, que tam só criou problemas, protestos e custos maiores dos de antes. Esta decissom tomou-se, ademais, num bar, bebendo uns copos. Criaçom de duas direcçoes gerais, onde chegava uma ou mesmo bastava uma secretaria, para universidades, que nom se notou nada nas três universidades galegas. Eliminaçom da de pessoal na conselharia com mais trabalhadores de todas. Marginaçom do corpo de inspectores de ensino na maioria das decissoes. Instauraçom do absurdo da gratuidade dos livros de texto. Feito tam negativo pedagogicamente, como desde o ponto de vista social. E, o que é muito mais grave, eliminaçom da renovaçom pedagógica, livre e independente, do nosso ensino. Grande contradicçom, quando os socialistas foram sempre, já nas épocas republicanas, os máximos defensores da renovaçom pedagógica da escola. Dos que podemos destacar, de forma sobranceira, a José Mª Maravall e Marta Mata i Garriga, que me honraram com a sua amizade.
O outro dia, ao ler a notícia em dous jornais da província corunhesa, nom acreditavamos no que estavamos lendo. A ex-conselheira pretende ser a primeira mulher que dirija a USC. A sua aspiraçom de ser reitora em Compostela mesmo é apoiada polo ex-reitor Carlos Pajares. Este catedrático de Física, ao que tratei quando fum subdirector e director da Escola Normal, era, no seu momento, o melhor e mais idóneo candidato para dirigir a Conselharia de Educaçom. Que ao final nom foi, possívelmente por aquele sistema difícil de entender, da paridade de sexos porque sí. Nom entendemos bem este seu apoio à ex-conselheira. Que parece ser uma boa investigadora de genêtica, mas isso nom tem nada a ver, ou tem pouco que ver, com entender de forma ampla e positiva sobre educaçom, e sobre como gestionar a nossa mais antiga e histórica universidade. Eu mesmo, a dia de hoje, estou aínda à espera de ser recibido em audiência pola lucense Sáchez Piñón. Tal audiência fora solicitada, de forma pessoal no seu gabinete, em outubro de 2007. Para expor-lhe a persecuçom que, contra os nossos movimentos de renovaçom pedagógica, estava levando a cabo a sua infausta directora geral de inovaçom (?). Para encontrar soluçoes, e seguir organizando actividades de formaçom do professorado em exercício. Sempre e quando desaparecera a persecuçom e inquisiçom, tam sectária, da sua conselharia. Solicitava-lho eu, que dediquei mais de trinta anos da minha vida, (ademais de à formaçom inicial), à formaçom permanete do professorado. Tirando tempo do disfrute das minhas férias e de estar com a minha família. Finalmente, tal como lhe aconteceu a Baltar com Tourinho, nom fum recibido pola ex-conselheira.
Se ao final accede à reitoria compostelana, acompanho no sentimento a alunos e alunas, e aos docentes, entre os que tenho muitos e importantes amigos. Pois eu, de 1972 a 1990, tambem fum professor dessa universidade. E, para redondear a faena, podia levar de asesoras às que teve como subdirectora e directora gerais de inovaçom. Porque, como vicerreitoras, embora o desejaram, nom pode ser.
(*) Professor Numerário da Faculdade de Educaçom de Ourense
