Quédache unha toalla no baño. Se queres almorzar, hai café acabado de facer. Cando marches bastará que empuxes a porta. Xa te chamarei, dixo a muller antes de despedirse e marchar. O home levantouse ás dez da mañá. Non coñecía da muller que onte o trouxo á súa casa, e coa que tivo unha esgotadora noite de sexo, máis que o seu nome e agora o seu apartamento. Na cociña comprobou que había café quente. Encheu medio vaso. Na neveira atopou leite, co que completou a outra metade. Duchouse, secouse e vestiu a mesma roupa que levaba posta o día anterior. Cando estivo preparado para saír, sentou un intre no sofá do salón e dirixiu a vista ao perímetro.
Preguntábase se polo tipo de casa podería deducir o tipo de persoa e o traballo de Verónica. Había estantes con libros, películas e música. Non había fotos. Había unha televisión plana, un dvd, un equipo de música, un moble con bebidas. Non había cadros colgados das paredes. Fixo un percorrido polas habitacións da casa. O cuarto de baño. O dormitorio que xa coñecía. A despensa. Unha estancia de traballo. Había mesa de oficina, ordenador portátil, estantes rebordantes de libros. Non había luz cenital. Gustoulle aquel espazo. Era íntimo e acolledor. Non puido escapar á tentación de sentar na cadeira xiratoria de coiro branco. Acomodouse. Logo ollou de preto algúns obxectos que había na mesa. Estilográficas, post-it manuscritos, recortes de xornais. Había misterio na estancia.
Non debía pero abriu un dos caixóns da mesa. A modo. Ups. Atopou unha bolsa cun po branco que só podía ser cocaína. Cen gramos, calculou. Estaba sorprendido. Ese descubrimento aumentou a súa curiosidade. Abriu o caixón inferior e nel achou unha pistola automática e balas. Moitas balas. Fechou axiña. A sorpresa deu paso á preocupación. Que clase de persoa gardaba armas e drogas na casa? Non quería sacar conclusións precipitadas, pero cando abriu o terceiro dos caixóns e viu pequenos montóns de billetes, pasou da preocupación ao medo. Xusto entón, observando a silueta dos billetes de cincocentos euros, oíu como entraba unha chave na cerradura da porta.
