Segundo veñen recollendo os medios de comunicación nos últimos días, España non saíu nada ben parada nas probas do denominado PIAAC (adaptación do programa PISA para adultos). Cuns resultados que non se corresponden cos da media dos países da OCDE.
De pouco vale que, no apartado de Lectura, tampouco alcanzasen a media países tan importantes como Inglaterra, Dinamarca, Alemaña, EEUU, Austria, Francia e Italia. Nin que no apartado de Matemáticas tampouco a alcanzasen: Australia, Canadá, Corea do Sur (¡), Inglaterra, Francia, EEUU e Italia. De pouco vale, si, porque os resultados son os que son, por máis que puidese dárselles algunhas voltas. Con críticas moi duras. A máis común de todas elas, polo feito de que os españois non fosen quen explicar de maneira acertada a factura de consumo eléctrico, no formato que se usa por aquí . '¡Qué vergüenza, qué vergüenza! Estos ignorantes ni siquiera fueron capaces de explicar el contenido de un recibo de la luz'.
Por ver se puidese existir razón para tanto anoxo, supoñamos que aos participantes lles mostrasen un recibo similar ao que me chegou a min a semana pasada. Na columna Prezos, figuran as seguintes anotacións correspondentes ó último bimestre: Prezo/porcentaxe: 0'059981 euros/kW/día, 0'09767 euros/kW/d, 0'140728 euros/kW/d, 0'124985 euros/kW/d, 0'130485 euros/kW/d, 4'864%, 21%. No gráfico Historial de facturación (con 16 barras), hai tres bimestres que non pasan de 25 kW, en tanto outros acadan os 800 kW. Por se quedase algún punto escuro, inclúen, a maiores, as seguintes notas 'aclaratorias': El importe a pagar en concepto de impuesto se obtiene multiplicando el factor de corrección (1'051113) y el tipo impositivo (4'864%) por la suma de los importes correspondientes a la energía consumida y a la potencia contratada. Servicio: 97'237%, Permanentes: 0'150%, Diversificación y seguridad de abastecimiento: 2'613%. El importe que la compañía comercializadora debe pagar a la compañía distribuidora correspondiente a su factura de acceso a la red durante el período ha sido de 56'38 euros. (Mesmo como se estivesen a parodiar aos Irmán Marx: 'A parte contratante da primeira parte será considerada como a parte contratante da primeira parte'). Vale.
Xa que así, ¿puidese haber algunha causa que desvirtuase os resultados?
