Antonio Míguez Nogueiras: "En Vilar de Santos dá igual quen sexa o alcalde, todos somos un equipo"

Como asume esta nova etapa? É complicado o feito de suceder aos alcaldes anteriores porque foron moi bos. Xan Jardón ten os seus motivos persoais para tomar a decisión que tomou e eu, que levo moitos anos como tenente de alcalde, pois decidín sustituilo. Vostede foi tenente de alcalde tanto de Xan Jardón como de Antón Jardón. Si. Eu como concelleiro levo aquí ao redor de 23 anos. Como tenente de alcalde uns 18. Digamos que vostede non é novo aquí para ninguén, todos os veciños o coñecen. Non, a verdade é que non son novo. A min, ademais, sempre me gustou a política local e municipal. Tamén o contacto coa xente. Seguirá a liña do seu predecesor? Claro, si. Seguiremos na mesma liña porque aquí somos un grupo de xente que traballa. O que menos importa en Vilar de Santos é ser alcalde ou concelleiro. Aquí somos unha agrupación de veciños moi unidos dende a democracia e así continuaremos. Non hai interese nin por ser alcalde nin por ser concelleiro. Bueno, algo cambiará a situación para vostede a partir deste momento. Si, estarei máis no día a día sobre o terreno e coa xente. O feito de non percibir dedicación como alcalde a que obedece? Eu vivo do meu. Comentaba que seguirá unha liña continuista e en consonacia co seu predecesor, pero, hai algo que queira facer, promover ou recuperar? Gustaríame recuperar a rede de alcaldes pedáneos que había antigamente. Eso é algo que permite estar máis preto dos veciños, algo que pretendemos sempre. Temos os mellores veciños e os mellores funcionarios. É algo que se pode dicir. Entendo que tamén comezará a traballar establecendo un contacto coas agrupacións e asociacións do concello. Si, aquí temos unha asociación que acaba de conformarse recentemente e que agrupa a todos os artesáns da Limia. Tamén unha agrupación de mulleres. Somos un concello pequeno pero con moito movemento. E a nivel infraestructuras? Si. Imos a facer a segunda fase da pavimentación do pobo de Vilar de Santos e acabamos de facer o de Parada. Tamén acondicionamos unha traída de auga en Laioso e imos a tratar de manter os servizos que sempre tivemos e que foron moi bos. Os servizos, en xeral, sempre foron unha das principais vías de traballo en mandatos anteriores. Os servizos en Vilar de Santos son fundamentais. Aquí temos uns bos resultados electorais e unha xente que nos vota pero non por casualidade, nos esixe moito. Os dous rexedores anteriores gobernaron sempre con amplas maiorías e prácticamente sen oposición, esto xenéralle algún tipo de presión? Si que houbo unha época, cando pasabamos dos 1.000 habitantes, que tivemos oposición. Penso que dous concelleiros do PP fronte a nós que eramos sete. Pero é certo que ultimamente non tivemos oposición. Sobre a presión, insisto, somos un grupo. O alcalde é o que leva o nome pero o grupo de goberno aquí é moi importante. Nós traballamos xuntos, sen discrepancias e ben. O seu grupo pasou de concorrer ás eleccións municipais por distintas siglas: BNG, Compromiso por Galicia, Xuntos Vilar de Santos… A súa posición ideolóxica, en concreto, por onde pasa? Vai por aí: galeguista e progresista. Que destacaría do seu predecesor no cargo, Xan Jardón? É moi boa persoa. E como xestor? Pois como xestor… a el e a Antón pouco máis hai que pedirlle. Falamos de xente moi preparada, moi querida. Téñeno todo. A miña meta non é sustituilos porque xamais chegaría. En Vilar de Santos observa algunha inquedanza? A nivel demanda de emprego, por exemplo. Nós temos un bo parque empresarial, dos grandes. Tamén unha das grandes empresas da Limia, con 70 empregados. Pero seguiremos dándolle vida ao pobo polos que veñan detrás. Eu quero é manter o grupo unido, que estamos e somos, e despois darlle paso á xente nova. Será vostede a aposta para as vindeiras eleccións municipais? Non toca, non che vou a dicir nin que si nin que non. Di vostede que non ten experiencia ante os medios e como alcalde, pero xa sabe contestar como un. (Ri) Eu non sei, nesto non ando eu… Si? A ver se me entendes, non me planteo agora iso. Se os compañeiros queren que sexa… Ao mellor son.