O PP quere promover un cambio lexislativo que permita non repercutir o IVE non deducible aos regantes da Limia
O Grupo Popular nos concellos de Xinzo, Porqueira e Trasmiras levará aos plenos municipais dos seus respectivos consistorios unha moción na que reclaman ao Goberno nacional solucións a o financiamento do Plan de Regadío.
Na moción solicítase instar ao Ministerio de Agricultura, Pesca e Alimentación a que promova un cambio lexislativo que permita non repercutir o IVE non deducible aos regantes, e no caso de que este non fora posible, asumir a financiación do 80% de dito IVE. Tamén reclaman que revise o esquema de financiamento do convenio para evitar que os regantes teñan que avalar o montante total do seu investimento. E, ademais, instan á Xunta de Galicia e á Deputación de Ourense a que asuman a financiación do 20% do IVE da actuación, no caso de que non se acade o cambio lexislativo que permita a súa non repercusión.
Argumentan os populares que A Limia é unha potencia agropecuaria na Comunidade, polo que a modernización do seu regadío “vai máis aló da necesidade inquebrantable da sustentabilidade da actividade levada a cabo alí e por iso reivindicamos melloras que redunden no beneficio dos produtores desta comarca solicitando ao Goberno central un esforzo adicional que se traduza en novos investimentos para a mellora do regadío”.