ENTREVISTA

"Queremos batir a marca da pataca máis grande, que está en 2,680 quilos"

A Limia é unha comarca agraria que presume do seu produto estrela: a pataca. En Vilar de Barrio, ademais, sacan peito del, e cada ano -dende hai 38- promoven unha Festa única en toda a comarca: a festa da Pataca. Serán quen de superar nesta edición o récord do tubérculo máis grande?

José Antonio Cid, un dos nove promotores da festa, no centro de Vilar de Barrio.
José Antonio Cid, un dos nove promotores da festa, no centro de Vilar de Barrio.
"Queremos batir a marca da pataca máis grande, que está en 2,680 quilos"

A Limia é unha comarca agraria que presume do seu produto estrela: a pataca. En Vilar de Barrio, ademais, sacan peito del, e cada ano -dende hai 38- promoven unha Festa única en toda a comarca: a festa da Pataca. ¿Serán quen de superar nesta edición o récord do tubérculo máis grande? José Antonio Cid Gómez, un dos nove promotores deste evento para o que non hai consignada ningunha subvención máis que as pequenas aportacións que fan os socios da agrupación creada para organizalo, dá todas as claves e adianta algunhas das novidades. 

Cando e porque xurdiu esta festa?

Foi hai 41 anos, o que pasa e que houbo tres nos que non se fixo. O alcalde de Vilar de Barrio decidiu suspendela e nós retomámola hai catro dende a Asociación Festa da Pataca. Loitamos moito para sacala adiante e facémola coincidir coa campaña de recollida. 

Cantos visitantes se achegaron o ano pasado á Vilar de Barrio?

Unhas 600 persoas. A afluenza adoita depender moito do tempo. Nesta edición, e tendo en conta que será ponte, agardamos moita máis xente. 

Que novidades teñen para esta 38 edición do evento?

Este sábado, a partir das 18,00 horas, haberá un ciclo de conferencias: unha enfocada aos nenos e as outras á xente mais maior. A dos nenos será sobre a Lagoa de Antela e as dos maiores tratarán o uso dos pesticidas e tamén sobre a lagoa. Destas últimas, unha estará impartida por Anxo Pérez, que é enxeñeiro agrícola e a outra por Serafín González, doutor en Bioloxía e presidente da Sociedade Galega de Historia Natural. O domingo, dende as 12,00 horas, teremos os tradicionais concursos, entre os que se atopan a pataca máis grande e a máis rara, e exposicións coma a dos nenos, que adoita ter moita expectación. Tamén haberá xogos populares grazas ao Centro de Desenvolvemento O Viso e todo tipo de atraccións e inchables, ademáis de comida a prezo popular os dous días. 

Que lles motivou a incluir a Lagoa de Antela no ciclo de conferencias?

Que a xente a coñeza porque a maioría escoitan falar da lagoa pero casi ninguén sabe o que foi. As persoas maiores si, pero o resto non, e queremos que saiban o que había e o que puido chegar a ser.

Que se perdeu, según vostede, coa Lagoa de Antela?

Non teño unha opinión moi formada. Supoño que naquel momento, os seus motivos terían para abordar aquel proceso. Penso que a lagoa desecada deu moito diñeiro aos agricultores, pero entendo que para os ecoloxistas fose unha marcha atrás. Tampouco sei como estaría agora de tela mantido. 

Teñen a única festa da comarca que ensalza o seu produto estrela, que pretenden con ela?

Si, somos a única. Creo que en Xinzo queren facer unha exposición ou algo similar, pero de momento somos os únicos. Queremos ensalzar o produto aínda que nos gustaría chegar moito máis lonxe, o problema é que non temos axuda institucional ningunha. Co que temos queremos axudar aos agricultores, premialos e dar a coñecer a pataca da Limia. 

Cal é o record da pataca máis grande?

Son 2,680 quilos e leva invicto dende 1994. Ninguén logrou superar esta marca. O premio para quen o consiga será de 100 euros, ademais dos 200 que tería por presentar a máis grande da festa.