A posta en marcha da chamada "autoestrada do mar", o sistema de transporte marítimo entre o porto de Vigo e o de Saint Nazaire, no oeste de Francia, comportará unha "redución de custos" para o traslado de mercadorías, afirmou hoxe o presidente do porto de Vigo, Ignacio López-Chaves.
O proxecto, que entrará en funcionamento en outubro, permitiralles ás empresas "importar e exportar por vía marítima máis barato que agora", comentou López-Chaves nunha conferencia de prensa posterior á reunión do consello de administración da Autoridade portuaria de Vigo.
As axudas de tres millóns de euros da Unión Europea mediante o programa Marco Polo II e as subvencións de 15 millóns de euros por parte dos gobernos de España e Francia posibilitarán que "os prezos sexan máis competitivos".
Iso podería levar a que o transporte por estrada poida ser derivado por mar, posibilitando movementos de mercadoría "máis baratos", comentou.
"Van cambiar os fluxos de mercadorías da terminal de Bouzas con máis frecuencias e un tráfico non acompañado que implica redución de custos tendo en conta que non hai condutor que acompañe a mercadoría", indicou.
Nese sentido, o responsable do porto de Vigo celebrou que a Comisión Europea lograse superar o "último obstáculo ou requisito" para poñer en marcha ese proxecto de "autoestrada do mar".
A autorización garante que as axudas de Estado "non vulneran a competencia e son totalmente legais", polo que lle agradeceu á actual ministra de Fomento, Ana Pastor, a súa "implicación" durante as reunións da comisión gobernamental entre España e Francia nas que se aceptou o proxecto da navieira explotadora Suardíaz.
