O reitor da Universidade de Santiago, Juan Casares Long, dixo hoxe na apertura do curso 2011/12 que espera que a institución académica continúe a medrar neste ano 'polo menos un pouco', a pesar dos apertos derivados de traballar cuns recursos económicos limitados e escasos'.
Casares Long, nun breve encontro cos xornalistas antes do inicio do acto de apertura do curso académico, subliñou que os recursos económicos están 'na liña de flutuación' do hipotético navío, aínda que adiantou que a institución espera continuar implantando as novas titulacións de grao.
'Aínda temos esa situación complexa de manter as licenciaturas en extinción, mais cada vez con menos licenciaturas e máis graos', sinalou Casares, quen apuntou que no novo curso académico espera lograr os mesmos éxitos ou maiores no ámbito da investigación que no curso pasado, porque 'a nosa é unha universidade que está entre as mellores e temos que continuar aí, como sexa'.
Tamén manifestou o reitor que a institución está cumprindo coas expectativas no referente ao número de alumnos nas titulacións con límite de prazas, porque 'case todas as temos xa cubertas e, polo tanto, penso que as perspectivas están na mesma orde de magnitude que no pasado ano'.
A secretaria xeral da Universidade, Lourdes Noya, informou da memoria do pasado curso académico, en que cursaron estudos 32.369 universitarios que puideron escoller entre 63 titulacións oficiais de primeiro e segundo ciclo, todas xa en proceso de extinción e substituídas por 48 titulacións de grao.
Ademais, no curso pasado ofertáronse un total de 74 mestrados oficiais e 25 propios, así como 34 cursos de especialización aos que se suman catro titulacións propias.
Con respecto á investigación, afirmou Noya, foron lidas 220 teses de doutoramento e alcanzáronse 486 proxectos de investigación con convocatorias competitivas que representaron un total de 31,55 millóns de euros.
Ademais, informou, os investigadores da USC obtiveron pola vía de contratos, ditames, servizos ou informes máis de 14 millóns de euros, co que se logrou captar 10 por cento dos recursos externos entre as universidades.
A Universidade de Santiago, nos seus campus de Lugo e de Compostela, dispón de 2.223 docentes e 1.274 traballadores de administración e servizos.
O discurso inaugural deste acto, celebrado no salón nobre de Fonseca, correu a cargo da catedrática de Comunicación Audiovisual e Publicidade, Margarita Ledo Andión, baixo o título 'Indicios de desaparición e tres fotografías desde onde o mundo se chama Galicia'.
Ledo Andión fixo un percorrido sobre dúas décadas de fotografía en Galicia ao tempo que denunciou a situación dos profesionais obrigados a marchar a outros territorios.
'Non estou dicindo nada novo cando sitúo o problema máis grave da relación universidade-sociedade precisamente na desaparición de persoas ben formadas para a distancia', afirmou.
Asistiron ao acto académico o alcalde de Santiago, Gerardo Conde Roa, o presidente do Consello da Cultura Galega, Ramón Villares, os anteriores reitores da USC Darío Villanueva e Senén Barro, e o fiscal xefe do Tribunal Superior de Xustiza de Galicia, Carlos Varela, entre outros.
O acto académico concluíu coa interpretación do Gaudeamus por parte do coro da Universidade.
