A CIG denuncia o 'desmantelamento' do Servizo de Vixilancia Aduaneira en Galicia

Esta situación foi denunciada polos delegados sindicais Henrique García e Antón Lestón, nunha conferencia de prensa na que tamén participou o deputado autonómico do BNG Bieito Lobeira, quen anunciou que a formación nacionalista pedirá explicacións ao respecto nos parlamentos autonómico e estatal.

O delegado da CIG no SVA, Henrique García, fixo alusión en primeiro termo aos medios aéreos, e explicou que ata mediados de 2010, este servizo contaba en Galicia cun avión con base en Santiago de Compostela e un helicóptero con base en Vigo.

Non obstante, 'a mediados de 2010' a Axencia Tributaria decidiu asignar a unha empresa civil a xestión do citado avión, que ata entón operaba a través dun convenio co Exército do Aire. Por iso foi necesario que fose trasladado a Madrid para facer 'unha serie de reparacións e inspeccións técnicas' que permitisen adecualo á aviación civil, explicou o indicalista.

Posteriormente, a CIG atopouse coa 'sorpresa de que o avión xa non ía volver', senón que o SVA pasaría de traballar con tres avións -con base en Santiago, Murcia e Cádiz- a facelo con dous, ambos os dous con base en Alicante. Ao mesmo tempo, o helicóptero existente foi substituído por outro 'en peores condicións e con menos autonomía', engadiu.

ENTRADA DE DROGA

O delegado sindical tamén explicou que a 'escusa que dan para deixar todo o norte da península sen cobertura aérea' é que a entrada de droga a través de barcos pola costa galega -'unha das portas fundamentais de entrada de droga para Europa'-, descendeu, mentres que as aprehensións se incrementaron en Andalucía e Levante.

Non obstante, para este sindicato, Galicia 'segue sendo clave para os narcotraficantes', e por iso García apuntou que, se ben 'as dificultades que se poñían' podían levar ás redes de tráfico de drogas a desembarcar noutro punto da xeografía española, 'se lles quitas os medios, automaticamente van volver facelo nas costas galegas', posto que os narcotraficantes galegos 'se seguen dedicando a iso'.

Por iso, García augurou que estas medidas van supoñer unha volta a 'tempos pasados, de masificación de planeadoras polas rías e entrada de droga polas nosas costas'. Nesta liña, a CIG solicitou reunións tanto co delegado do Goberno en Galicia, Antón Louro, como cos grupos políticos representados no Parlamento de Galicia.

MEDIOS MARÍTIMOS

O responsable da CIG na Axencia Tributaria, Antón Lestón, tamén mostrou a súa 'preocupación' por un 'desmantelamento' que non se limita só aos medios aéreos, senón que tamén afecta aos marítimos ou á vixilancia dos colectores que entran nos portos galegos.

De feito, explicou que no porto de Vigo se instalou un escáner 'moi custoso' para supervisar o contido destes colectores, pero ao que só destinaron 'tres funcionarios', polo que tan só pode usarse 'de luns a venres en horario de mañá', o que provoca que, dos 250.000 colectores que entran anualmente neste porto, sexan supervisados cada ano 'uns 2.000'.

Por iso, Lestón sinalou que 'se a desculpa da Axencia Tributaria é que a droga non entra tanto por mar como a través de colectores' sería preciso dotar de máis persoal este servizo.

O responsable da CIG tamén criticou o 'desmantelamento' dos medios marítimos do SVA, aludindo a que xa se pediu a substitución da embarcación con base en Ribadeo pola 'súa antigüidade e pola cantidade de avarías'; ao feito de que a de Muros teña 'máis de 25 anos'; que a de Marín 'traballa quince días ao mes por falta de persoal'; e que outro buque do SVA leve 'meses atracado en Vigo'.

PROCESO DE 'PRECARIZACIÓN'

No mesmo sentido, o deputado do BNG, Bieito Lobeira, tamén criticou o 'proceso progresivo, paulatino e irresponsable de desmantelamento e precarización dos medios existentes para a loita contra o narcotráfico' que Galicia vén padecendo dende hai anos, e apuntou que 'non pode esquecerse' o 'drama histórico' con 'consecuencias desvastadoras' que esta autonomía viviu a causa de 'lácraa do narcotráfico e as súas mafias'.

'Tampouco pode esquecer que o 60 por cento da cocaína aprehendida segue entrando por Galicia', engadiu Lobeira, quen acusou o Goberno de España de ver a loita contra o narcotráfico como un 'negocio' e non como un 'servizo público'.

Así mesmo, o deputado nacionalista tamén criticou o Goberno galego por non ter 'un momento para preocuparse desta situación' a pesar dos acordos parlamentarios aprobados ao respecto.

Por iso o BNG vai esixir explicacións no Parlamento de Galicia e no Congreso dos Deputados, ao mesmo tempo que solicitarán a comparecencia dos delegados da CIG na cámara galega, co ánimo de 'rematar con este trato vergonzoso, humillante e indignante do Estado a Galicia' nesta materia, sentenciou Lobeira.