Samba Beye, de 27 anos, leva en paradero descoñecido dende a tarde do venres.
A comunidade senegalesa establecida en Lugo procura, coa axuda dos Corpos e Forzas de Seguridade do Estado, un mozo compatriota que leva desaparecido desde a tarde do pasado venres, sen que por agora o lograsen localizar polas rúas da cidade.
Segundo informaron fontes policiais, o mozo desaparecido, Samba Beye, ten 27 anos e reside cun familiar na rúa dos Paxariños, na cidade de Lugo.
O home, que se dedicaba á venda ambulante, desapareceu no pasado venres e, desde entón, nin a familia nin os seus amigos en España teñen noticia do seu paradoiro, polo que a comunidade senegalesa en Lugo se organizou para procuralo polas rúas da cidade.
Por súa vez, a Comisaría Provincial de Lugo informou de que xa foi activado o protocolo de procura, de forma que xa se sumaron aos labores de rastreo efectivos da Garda Civil, do Corpo Nacional de Policía (CNP) e da Policía Local da cidade.
De momento, segundo o protocolo establecido, a policía considéraa unha desaparición de "baixo risco", polo que non foron solicitados máis medios dos dispoñibles en Lugo e aínda non participan na procura guías caninos.