O CEIP Vicente Risco de Cualedro está somerxido nun concurso que promove a reciclaxe de pilas e acumuladores, “Pilabot”. “É unha forma de concienciar aos nenos da importancia da reciclaxe”, explica Mercedes Iglesias, a directora do centro educativo.
Dentro do “Plan Proxecta: paisaxe e sustentabilidade” e do “CP Innova Sustentabilidade”, o colexio participa neste concurso galego que outorga dous premios: á maior cantidade de pilas recollidas por centro e ao alumno que máis pilas recolla. “Nós non podemos competir con coles grandes, pero si que temos boa participación. Houbo un ano que recollemos 850 quilogramos de pilas”, engade a directora.
Ademais, o colexio tamén promove a recollida de tapóns de plástico, unha forma de ensinar aos cativos conceptos de reciclaxe, pero tamén de solidariedade e xenerosidade.