O presidente da Deputación de Ourense, Manuel Baltar, recibiu ao novo alcalde de Nogueira de Ramuín, Julio Temes, que tomou posesión o pasado xoves e mostrou o apoio da institución provincial aos proxectos deste municipio. Baltar repasou con Julio Temes os proxectos máis inmediatos que este ten en carteira para esta nova etapa e para os que solicitou o apoio da Deputación. Entre eles, citou a execución de traballos medioambientais no municipio; a mellora de redes de abastecemento nos lugares de Requeixo e A Cancela en Armariz; o acondicionamento dos parques infantís dos Prados e San Miguel; a humanización da travesía en San Miguel-Gundiás; a mellora de accesos a Requeixo de Loña-Virxe do Monte, e actuacións na estrada San Esteban-Loureiro.
O presidente provincial afirmou que o alcalde de Nogueira “contará co apoio da Deputación para desenvolver os seus proxectos”, de tal xeito que a veciñanza “siga a senda de progreso que se iniciou hai décadas nun dos municipios emblemáticos da provincia, berce dos afiadores e un dos enclaves fundamentais de Ribeira Sacra”.
Baltar destacou a experiencia de Julio Temes na xestión municipal pola súa anterior etapa como alcalde, sen deixar de agradecer o labor desenvolvido nestes anos anteriores polo anterior rexedor, César Parente.
