As piscinas de Taboadela, as primeiras da comarca en abrir

Os concellos da área metropolitana de Ourense estanse preparando para a entrada do verán. Moitos contan con pisicnas, que son frecuentadas, ademais de polos residentes de cada concello, por moitos veciños da cidade que buscan escapar das multitudes. Así, estas son as 10 alternativas ás piscinas da cidade nos concellos máis achegados. TABOADELA As de Taboadela serán as primeiras instalacións en abrir, xa que o farán o 15 de xuño. O horario tamén será dos máis amplos, de 12,30 a 20,30 horas, e os prezos son os mesmos do ano pasado: os nenos e maiores de 65 anos pagarán un euro, mentres que os adultos 1,5 euros. Aqueles que non residan na localidade terán que pagar dous euros se son adultos e 1,5 euros se é un menor de idade. Tamén haberá bonos que irán desde os 8 a 25 euros para os empadroados e de 35 a 40 euros para os que non o estean. Ademais, aínda que se prevé clausurar a temporada o 31 de agosto, non se descarta ampliala ata 15 días. PEREIRO DE AGUIAR Este municipio conta con dúas instalacións no seu territorio, aínda que ambas son propiedade da Xunta de Galicia: o complexo de Monterrei e a piscina do Parque Tecnolóxico. Ante o previsible peche das primeiras, as segundas abrirán as súas portas o sábado 18 de xuño e estarán dispoñibles ata o 11 de setembro. As condicións serán as mesmas que as do ano pasado, aínda que se eliminarán os controis de aforo, que o ano pasado estableceuse no 50%. SAN CIBRAO En San Cibrao contan coas piscinas de Ponte Noalla e Soutopenedo. Ambas instalacións adiantarán este ano a data de apertura, xa que abrirán ao público o 19 de xuño, a diferencia do ano pasado, que se puxeron en marcha o 1 de xullo. O horario tamén muda respecto a 2021, xa que o tempo partido sustitúese por un horario continuo de 13,00 a 19,00 horas. Só os nenos de 0 a 3 anos e os maiores de 65 anos poderán entrar de forma gratuíta. Os menores que teñan menos de 16 anos terán que pagar un euro por entrar, mentres que o ticket para os adultos custará dous euros. BARBADÁS Barbadás adiantará este ano a apertura das súas piscinas á semana do 20 de xuño, tal e como apunta o concelleiro de Deportes e Mocidade, Abel Cortés. Os prezos e os horarios volverán ser os do ano pasado, isto é de 12,00 a 15,00 horas e de 16,00 a 21,00 horas. O prezo do ticket para acceder ao recinto é de 50 céntimos e un euro para os veciños do municipio. Tamén haberá un bono familiar que custará dous euros. Mentres, aquelas persoas que veñan doutro concello deberán pagar tres euros os adultos e dous os menores. Para os residentes haberá un bono familiar de 18 euros, outro para un adulto de seis euros e outro para os menores de 15 anos de tres euros. AMOEIRO O Concello de Amoeiro prevé abrir as súas instalacións o 1 de xullo, dous días antes ca o ano pasado. Todo permanece igual ca no 2021, xa que permanecerán abertas ata o 31 de agosto e a entrada custará un euro aos menores de 15 anos, e dous no caso dos adultos. Ata 2020, a entrada a este recinto era de balde, pero ao ser agora unha empresa a encargada da xestión, cóbrase entrada. O horario será de 13,00 a 21,00 horas. ESGOS No caso de Esgos, as piscinas municipais tamén abrirán as súas portas o 1 de xullo, por un prazo de dous meses. Terán un horario de 16,00 a 21,00 horas e cuxa entrada individual custará 1,5 euros. Aínda que a prioridade para acceder ao recinto será primeiro para os empadroados no concello, cuxo bono custa 10 euros para os menores de 11 a 17 anos e 15 para os de 18 a 65 anos. TOÉN No caso de Toén, está previsto que a piscina abra o próximo 1 de xullo e manteranse ata o 31 de agosto, “se non hai ningún problema”, indica o rexedor, Ricardo González. VILAMARÍN En Vilamarín prevén abrir a piscina o vindeiro 1 de xullo, e estarán abertas ata o 31 de agosto. O horario será de 15,00 a 21,00 horas, e o acceso será de balde para os empadroados no concello. A PEROXA No caso da Peroxa, as instalacións están actualmente en obras, que está previsto que rematen a principios de xullo. Por isto, esperan rematar en prazo os traballos e abrir “poucos días despois”, asegura o alcalde, Manuel Seoane.