O PP e o PSdeG pronunciáronse sobre a eliminación do Comedor sobre Rodas, o servizo municipal que facilitaba a alimentación a preto de 60 persoas dependentes e que eliminou o goberno municipal de Jácome. Os socialistas apreman á Xunta a incorporar Ourense no Xantar na Casa -un programa autonómico similar-, mentres que os populares sinalan que Jácome xa ten o convenio e que o Executivo autonómico só espera que o rubrique.
Carmen Rodríguez Dacosta, deputada socialista ourensá no Parlamento de Galicia, anunciou onte que reclamará á Xunta “que tramite coa máxima celeridade posible” o convenio de adhesión do Concello ao Xantar na Casa.
Dacosta cargou contra “a mala xestión e o desmantelamento do benestar social” por parte do goberno de Jácome. Reivindicou a posta en marcha do servizo polos socialistas en 2007 e que naquel momento roldaba case os “400 usuarios”. Deste xeito, criticou que a cifra de beneficiarios foise reducindo “cos gobernos locais do PP e Democracia Orensana”. A deputada avanzou que presentará “unha batería de iniciativas parlamentarias” para que o Executivo autonómico actúe coa maior rapidez posible para garantir o servizo aos usuarios do extinto Comedor sobre Rodas.
Así e todo, dende o grupo municipal do PP din que “a realidade é que o propio alcalde se puxo en contacto coa Xunta no mes de novembro” e que esta “lle advertiu da necesidade de asinar un convenio que o propio alcalde ten desde xaneiro”. Os populares lamentan “nove meses nos que os servizos sociais se converteron nun avión sen rumbo”.
Dende o PP municipal censuran a “falta de vontade” de Jácome e a “incompetencia dun grupo de goberno que non foi capaz de tramitar un convenio de dúas follas e traelo á xunta de goberno en cinco meses”. Ademais, lembran o peche das UNIS para insistir en que o peche do Comedor sobre Rodas non é un “caso illado” e defende que os grupos da oposición “sempre estiveron á altura” en materia de servizos sociais.
