Non sei se é cabreo, se é indiferenza, se é mala uva ou se é pena, pero o caso é que noto un certo sabor amargo na boca e unha pequena dor nas entrañas. E aínda que vos pareza mentira, todo por unha vaca. Ou aínda mellor, pola cagada, pola caca dunha vaca. Aconteceu no concello de Santiago, onde un veciño denunciou a outro porque as súas vacas defecaban nas pistas cando saían para o monte. Agora, a denuncia pódelle custar ó gandeiro uns 750 euros. Escribir isto aínda me altera máis o sangue. Así é que sentencio eu mesmo a tal denuncia: que se son eu o xuíz, á persoa que rexistra a devandita denuncia, mándolle limpar a el as cacas de todas as vacas da comarca e non ó gandeiro. En Galicia!, meterse cunha vaca!, cando tiñamos que facer coma na India: adoralas. Por Deus bendito, se foron e son as que levantan o país da merda na que vivimos! É máis, en Galicia unha vaca debería ser unha deusa e un burro un deus. Así de simple e de sincero.
