Técnicos do concello trataron os exemplares cun produto antimildio que permitirá que se poidan recuperar
Técnicos fitosanitarios do Concello de Xinzo de Limia, en compañía do Concelleiro de Obras e Infraestruturas limiao Ricardo Sieiro, visitaron esta semana a praza Maior da capital comarcal para valorar o estado dos magnolios que a presiden.
Segundo sinalaron dende o Consistorio, estas árbores tan significativas para o pobo e para a súa praza central, sofren de mildio, unha enfermidade que tamén se dá nas viñas e que afecta á cor das follas e provoca a súa caída, aínda que tamén pode afectar aos talos.
O Concelleiro popular explicou que esta circunstancia está xustificada nos cambios climáticos tan extremos que está a sufrir Xinzo durante esta primavera, concretamente, nas altas temperaturas -de máis de 25 graos- que conviviron con xornadas de importantes precipitacións. Neste senso, engadiu que os magnolios xa están en tratamento cun producto antimildio que permitirá que estes exemplares volvan a lucir coma sempre.
Por outra banda, o Concello limiao, a través da Concellería de Medio Ambiente está a piques de rematar a repoboación da vila con máis dun centenar de especies. As novas árbores estanse ubicando en lugares como o parque de O Toural, a avenida de Ourense ou as inmediacións da Casa da Cultura.
