Os candidatos a gobernar en Xinzo buscan as maiorías para non repetir cuadripartito

Cal é a súa valoración destes últimos catro anos de goberno cuadripartito? Cales son as necesidades actuais que presenta o Concello de Xinzo de Limia? Cal cre que debería ser o proxecto estrela a desenvolver en Xinzo na próxima lexislatura? Elvira Lama (PSOE) Elvira Lama En xeral a valoración é moi positiva, porque logramos moitas melloras para Xinzo e para os veciños, porque gobernamos pensando só nas necesidades do pobo a pesar da situación da pandemia e das consecuencias do encarecemento das subministracións que consumiu a meirande parte dos recursos, polo que tivemos que buscalos noutras administracións. Con honestidade, tamén recoñezo que houbo cousas que se puideron facer mellor, especialmente no rural. A todos os condicionantes anteriores se sumou un goberno de catro partidos, con áreas definidas como consecuencia do pacto previo. Precisamos unha maioría máis ampla, para que os cambios se vexan en todos os pobos. A creación de postos de traballo na ampliación do parque empresarial, facilitar o autoemprego. A mellora da mobilidade coa reforma de moitas rúas e beirarrúas na vila e nos pobos, a dotación de rede de abastecemento e saneamento. Unha residencia de maiores, un auditorio, un gran complexo deportivo na Moreira, transformar o campo da feira en pavillóns de feiras e exposicións. Continuar a ser referente no deporte, na igualdade e na organización de eventos importante que favorecen a economía local. Sen dúbida, rematar a humanización das avenidas de Ourense e Madrid. Tamén eliminar os vertidos ao Limia e construír novos paseos e carrís bicis, a reforma do casco vello, executar a mellora do regadío e atender ás pequenas necesidades de cada veciño. Amador Díaz (ÁXIL) Amador Díaz (ÁXIL) Moi positiva no tocante ás áreas que dependeron de ÁXIL. Cando chegamos ó Concello a situación financeira era peor incluso que o estado de rúas, pistas e estradas. Tivemos que facer marabillas -con moita xestión- para conseguir que se tapasen fochancas. Fomos quen de asfaltar nos 32 pobos de Xinzo e tamén executar proxectos máis ambiciosos como a Rúa Sitibal ou o carril bici á Moreira. Fáltanos agora a Pista da Armada, que será a seguinte. Cremos que tanto Moncho coma min conseguimos isto á vez que fomos próximos coa xente, atendendo chamadas as 24 horas do día. No tocante a infraestruturas, é preciso traballar en edificios coma o Pavillón, a Casa da Cultura, ou o edificio en desuso das piscinas de verán. E por outra, construirase o tan demandado Auditorio Municipal, no enclave da antiga Feira do Toural. Tamén consideramos importante un anexo ó Pavillón para atender ás demandas deportivas. E podería seguir coas demais áreas, pois Xinzo estivo longos anos sumido na desidia e agora temos moito traballo por diante. A día de hoxe afrontamos a recta final da campaña coa ilusión de que seremos a forza máis votada. O noso proxecto estrela centrarase no emprego. E podendo ser contribuíndo á economía circular que anhelamos para o noso Concello. Apostaremos por atraer empresas, especialmente empresas transformadoras. Propoñemos un edificio no polígono para dinamizar o noso parque e contribuír en facelo máis atractivo. Camilo Vila (BNG) Camilo Vila (BNG) O BNG tivo representación neste cuadripartito, pero testemuñal. Na nosa análise estaba a necesidade de cambiar o liderado, de aí que aparecera a miña figura no verán. Como compañeiro Ramiro Rodríguez que asumiu a Concellería de Cultura, vexo que Xinzo mellorou discretamente pois o punto de partida era catastrófico, produto dunha longa traxectoria marcada polo PP. A situación é mellor, pero insuficiente para un concello do nivel de Xinzo. A labor que tivo o BNG foi moi discreta, de portas cara dentro. Nós agora queremos ter máis apoio para que non suceda que os perfiles máis políticos engulan a opinión pública. Son moitas. Englobaríanse en áreas de traballo. Para nós o fundamental e máis urxente é a planificación estratéxica do Concello, que nos indique o camiño cara onde ir e deixar de tomar, así, decisións un pouco improvisadas ou oportunistas. Ademais disto, nós vemos como esa falta de planificación provoca que Xinzo vila non sexa un lugar amable, seguro e humano, así como que a Casa Consistorial non asume a urxencia do reto demográfico. Temos un proxecto ambicioso que se desmarca do resto: unha rede de vivendas comunitarias públicas, en contraposición das macroresidencias que levan o resto de partidos, que non nos parecen unha opción financeira e humanamente responsable para a nosa xente. Nós apostamos por un modelo moito máis humano, próximo e económico con impacto nos pobos e na vila. Antonio Fernández (PP) Antonio Fernández (PP) Catro anos perdidos para os homes e mulleres do concello de Xinzo nos que, non só non executaron unha soa obra ou investimento propio, limitándose a rematar as que deixou pechadas o anterior Goberno Popular, senón que nin sequera foron quen de manter e conservar as que xa había: cero en xestión e cero en mantemento, gobernando de cara á galería -moitas veces á fotográfica-, facendo promesas, hoxe desgraciadamente incumpridas. Moitas e en moi diversos eidos. Despois do 28 de maio o Partido Popular ten unha ardua tarefa de goberno por diante para pór en funcionamento un concello desnortado e recompoñer os servizos e o mantemento básico das infraestruturas municipais abandonadas. Para levar a cabo este cometido conto cun excelente equipo que mistura experiencia de xestión e renovación xeracional co que recuperaremos estes anos perdidos. Eu levo catro eixos estratéxicos que faremos realidades nestes próximos catro anos e que, sendo municipais, terán un alto impacto para o despegue e a modernización de toda a comarca da Alta Limia. Son o fomento do emprego, un novo xeriátrico, o auditorio municipal, a implementación das plantas de tratamento de xurros e rematar o Plan de regadío. O primeiro e fundamental será o emprego e a implantación empresarial, que coa ampliación do parque que promoveu o PP no 2019, suporá a implantación de 19 novas empresas e a creación de centos de postos de traballo. Edelmiro Rodríguez (Vox) Edelmiro Rodríguez (Vox) A formación do cuadripartito fixo unha xestión un pouco deficiente. Para min teñen un suspenso. Creo que non houbo entendemento entre eles, porque un goberno de catro é difícil. Creo que se quedaron moitas cousas no tinteiro por facer por falta de acordo deles. Habería moitas cousas que mellorar, e quedaron moitas cousas por facer. Hai moita xente descontenta. As aldeas están moi deixadas, os veciños din que non van aos núcleos rurais a facer nada. No que é a vila, urbanisticamente está moi deixada, dá a sensación de sucia, de pobre, hai moita fochanca, degradación nas beirarrúas e o verde está un pouco sen coidar, tamén o río… En xeral todo. Hai cousas que anuncian ben, como a humanización da avenida de Ourense, é moi boa noticia pero incompleta, é un proxecto o que hai que darlle unha volta para a accesibilidade dos veciños. O anuncio do tema do regadío foise das mans. En definitiva, a xente está moi descontenta, din que queren un cambio, os veciños din que van castigar ao cuadripartito, non sei ata que punto. Hai moito que facer. En relación aos nosos proxectos estrela podemos falar da baixada de impostos, reforzar o tema das políticas sociais, tamén o sistema público de sanidade para terminar coas chamadas telefónicas e engadir especialidades, reforzar o tema do transporte para a xente maior e para os mozos queremos impulsar o polígono para xerar emprego e que non marchen da Limia.