O Programa Universitario para Maiores comezou na Casa da Cultura de Xinzo durante a fin de semana e, nesta primeira entrega -conducida por Jesús García, docente da Universidade de Santiago- abordouse o sistema educativo actual, o papel das familias para o desenvolvemento académico dos alumnos e a “necesaria” alianza entre os pais e os docentes.
Nesta iniciativa, coordinada entre a propia USC e o Concello de Xinzo -na xornada inicial estiveron presentes tanto a alcaldesa limiá, Elvira Lama, como o responsable de Cultura, Ramiro Rodríguez- os presentes participaron nun debate sobre os axentes e estilos educativos: dende o autoritario e o permisivo ata o democrático. Todo isto xirando sobre un mesmo eixo: o papel que deben levar a cabo as familias no proceso educativo.
A universidade para maiores -na que se poden inscribir persoas que superen os 50 anos- continuará tendo lugar durante todo o mes de abril grazas a un convenio asinado entre o Consistorio e a USC.
Baixo o título “O cine do cotiá: un achegamento á práctica documental”, o próximo encontro educativo celebrarase o sábado, día 9 de abril. Nesa entrega serán Alejandro Gándara e Olaia Tubío, profesores colaboradores do Programa Universitario para Maiores, os encargados de dirixir a formación.
Por último, o día 23 de abril, será a quenda para a historia, centrando a xornada no potencial da contorna neste senso e baixo a titoría de Carolina Casal, doutora en Arte Medieval pola USC. “Dando luz ao románico... Escoitando o falar das imaxes petrificadas”, será a primeira parte. Na segunda descubriranse San Xoán de Vilar de Santos e Santa Mariña de Xinzo de Limia.
