“Faremos campaña para acadar que a vía nova sexa declarada ben de interese cultural"

O presidente da Deputación de Ourense, Manuel Baltar, vén de asinar un acordo co presidente do Centro de Cultura Popular do Limia, Manuel Seoane, co obxectivo de garantizar, durante catro anos, a publicación da revista Lethes, así coma un monográfico que recolle a lenda da Raíña Loba. Tamén se abordará, do mesmo xeito, a dixitalización biográfica da Biblioteca da Limia, ubicada en Vilar de Santos. Seoane adiantou que, neste 2020, a revista Lethes poñerá en valor a Vía Nova do Camiño de Santiago co obxectivo de acadar a súa declaración como Ben de Interese Cultural. "A revista terá varios artigos feitos dende os puntos de vista arqueolóxico, paisaxístico e artístico". "É importante para nós que a Deputación nos axude xa que somos unha publicación moi modesta". Chegamos á décimo quinta edición da revista Lethes, sobre que vai a tratar nesta ocasión? Sempre hai artigos de distintos temas pero, neste número 15, tratamos de facer fincapé na Vía Nova. Imos a facer campaña para que se declare Ben de Interese Cultural. Haberá varios artigos neste senso e dende distintos puntos de vista: arqueolóxico, paisaxístico, e artístico. Tamén faremos outro tipo de actos que teñen que ver coa Vía Nova. Quen participará nesta ocasión? Estará Antonio Rodríguez Colmenero e tamén Santiago Ferrer Sierra, que é o arqueólogo que, habitualmente, traballa en Aquis Querquennis. José Benito Reza participará dende o punto de vista paisaxístico e Mario Crecente, que colabora coa Deputación e aborda, actualmente, o plan de termalismo, tamén fará a súa aportación neste número e dará unha visión do termalismo ao redor da Vía. Non faltarán outros habituais como José Antonio Carrera. Cando estará rematada a edición? En principio a finais do verán se as cousas van ben. De que xeito valoran o respaldo da Deputación e en que poderán mellorar? Para nós é moi importante porque somos unha publicación moi modesta que se fai coa colaboración desinteresada da xente. Cando había axuda de Política Lingüística pois era doado imprimir as cousas pero agora non. Por iso, para os que vamos con moita humildade, que a Deputación nos imprima os números é, como digo, moi importante. Xa o veñen facendo nos últimos números. Financiarse coa venda tamén é complicado porque é unha revista moi particular da zona da Limia. Que suporía para a Vía Nova a declaración de Ben de Interese Cultural? Actualmente vai tendo proteccións parciais e ten un recoñecemento xeral de todos os xacementos arqueolóxicos. Sen embargo, non ten o recoñecemento global que sería algo estupendo para que se puidesen facer investimentos sobre a vía dende Cultura ou dende o Goberno Central.n