Os novos accesos a Xinzo: carrís bici e máis glorietas

A comezos do pasado mes de setembro e aproveitando a visita do delegado do Goberno en Galicia, José Manuel Miñones, a Xinzo, o executivo local puxo enriba da mesa o proxecto valorado en máis de dous millóns de euros para renovar os accesos á capital limiá tanto pola avenida de Ourense, como pola avenida de Madrid, un plan moi necesario dadas as deficiencias estruturais que presentan estas transitadas zonas. Esta fin de semana o Concello de Xinzo asegurou que o Goberno “comprometeuse a financiar as obras e a darlle prioridade con respecto a outras que existen en Galicia”, polo que semella que a remodelación será pronto unha realidade aínda que, polo momento, non conte con data de execución. Sen embargo, o Goberno local liderado por Elvira Lama aproveitou nestes días para desgranar en profundidade o ambicioso plan previsto para a arteria principal da vila e que incluirá carrís bici, máis rotondas, viais de servizo, pasos de peóns e novas beirarrúas, ademais da renovación das redes de saneamento e de abastecemento. NECESIDADE DE REFORMA O crecemento da vila limiá nos últimos anos produciuse ao longo da avenida de Madrid en dirección ao vial de acceso á autovía A-52. Dende o Concello explican que “tendo en conta gran parte da poboación da localidade asentouse nesta zona na que non existen os pasos de peóns necesarios e beirarrúas nalgúns puntos, o executivo local proxectou a mellora dos accesos á vila pola N-525 -concretamente, do tramo da Avenida de Madrid, de 350 metros, que está pendente de reforma, e da avenida de Ourense, de 1.600 metros, dende a rotonda da avenida de Celanova ata os institutos-”. Tal e como desvelou o executivo, as obras irán encamiñadas a separar o tráfico rodado das zonas destinadas ao uso de peóns e estacionamento. Nun primeiro momento procederase á demolición das beirarrúas e á retirada do pavimento en peor estado, así como do mobiliario urbán. Unha vez rematada esta fase, levarase a cabo a renovación das redes de saneamento e de abastecemento e, do mesmo xeito, soterrarase o alumeado co obxectivo de mellorar a parte máis estética. Neste senso, tamén se retranquearán luminarias e semáforos para adaptalos á nova aliñación das aceiras. Por outro lado, na Avenida de Ourense, tanto na entrada á zona urbana -fronte ós institutos- como no entronque da N-525 coa pista dos Castros e a pista do Zepetal, executaranse dúas glorietas de 6,5 metros de radio interior e 14 metros de radio exterior e construirase un carril bici ata os institutos. Tamén na avenida de Ourense executarase unha vía de servizo nas dúas marxes e pasos de peóns.