O Concello de Xinzo de Limia e o de Sandiás promoverán a celebración dun obradoiro de emprego do que se beneficiarán 16 persoas en situación de desemprego e que mellorará considerablemente distintas infraestruturas ao paso da Vía da Prata, que atravesa ambos municipios. Estes dous concellos uniron esforzos para solicitar á Consellería de Emprego e Igualdade unha subvención por valor de 277.556 euros co propósito de poñer en marcha esta iniciativa, a cal prolongarase durante un periodo de nove meses e formará a profesionais da albanelería e da xardinería. Os alumnos do obradoiro serán desempregados maiores de 18 anos que recibirán un certificado coa duración en horas da súa participación no programa, o nivel de formación teórico-práctico adquirido, os módulos formativos cursados e un diploma. Neste senso, as bases de selección do alumnado poden consultarse na páxina web do Concello.
Dende o Concello de Xinzo xa desvelaron algúns dos proxectos previstos a desenvolver na súa área e que contarán con financiamento municipal: a mellora da pavimentación e accesibilidade no Camiño de Santiago ao seu paso pola avenida de Ourense, o parque do Pombal e a rúa Rosalía de Castro, así como a rehabilitación dunha área degradada que se atopa á beira do río Limia -ao carón do parque da Seara e a estrada de Baltar- para convertela en parque urbano. Neste punto está previsto acondicionar un servizo de esparexemento dos peregrinos.