Sandiás terá este Nadal unha programación de actividades para todos os públicos. A festa para os máis pequenos estará protagoniza polo alumnado do colexio de Sandiás e os máis pequenos do Punto de Infantil. Ademáis de sorpresas preparadas polos cativos, animará o ambiente o grupo Priscila coa súa interpretación de “Versións de Nadal”.
Celebrarase o venres 22 de decembro ás 19,00 horas no salón de actos e local social do Concello. Abrirán o Nadal co II Concerto de Coro de Cámara “Madrigalia” que tanto éxito tivo na súa primeira edición do ano pasado. A Igrexa de Santo Estevo é unha magnífica contorna onde estará de protagonista a boa sonoridade da nave central e o retablo do famoso escultor Francisco de Moure da Igrexa de Santo Estevo. Será o xoves, 21 de decembro ás 19,00 horas da tarde.
Non podía faltar nestas festas un espectáculo de maxia (“Un día máxico”) protagonizado polo mago e ilusionista Mago Albert. Terá lugar o venres, 29 de decembro, ás 20,00 horas, na Casa de Cultura. Tamén contos de Nadal para os máis cativos narrados coa colaboración de Cristina, coordinadora do Punto de Atención Infantil.
Non faltará a Visita dos Reis Magos aos máis pequenos (venres, 5 xaneiro pola tarde) e recuperase por segundo ano a tradición do Cantar os Reis en colaboración co CDR O Viso (venres, 5 de xaneiro, pola mañá).
Tamén comeza a V Campaña de solidariedade ao redor da recollida de diñeiro, alimentos e roupa coordinada entre o Concello e as parroquias de Piñeira, Couso e Sandiás. Os alimentos irán ao Banco de Alimentos de Ourense, a roupa ao almacén de Cáritas do arciprestado de Xinzo de Limia e o diñeiro doado investirase en gran parte na potenciación do comercio local.
